Բացել լրահոսը Փակել լրահոսը
A A

18.3 տոկոսանոց անկում

Տնտեսություն

Չնայած Հայաստանի տնտեսությունը այս տարվա սեպտեմբերին նախորդ ամսվա համեմատ 4.8 տոկոս աճ է արձանագրել, այդուհանդերձ հունվար-սեպտեմբեր ամիսներին ունենք 18.3 տոկոսանոց անկում' նախորդ տարվա նույն ժամանակահատվածի համեմատ:

 ՀՆԱ-ն կազմել է 2123218.4 մլն դրամ: Այդ են վկայում Ազգային վիճակագրական ծառայության այսօր հրապարակված  ՀՀ սոցիալ-տնտեսական վիճակը բնութագրող մակրոտնտեսական ցուցանիշները:

Հիշեցնենք, որ նախորդ ամիս այդ անկումը 18.4 տոկոս էր:

Գրեթե բոլոր ճյուղերում աննշան աճեր կան օգոստոսի համեմատ, մինչդեռ նախորդ տարվա կտրվածքով թվերը գոհացուցիչ չեն:

Հայաստանում 10.3 տոկոսով ավելացել է պաշտոնապես գրանցված գործազուրկների թիվը' կազմելով 83.100  մարդ, իսկ նախորդ ամիս 83.800 էր, փաստորեն 700 մարդ աշխատանք է գտել:

Ըստ ԱՎԾ տվյալների' նախորդ ամսվա համեմատ 8.8 տոկոսով աճել է շինարարության ծավալը: Ցուցանիշները ցույց են տալիս, որ շինարարության ծավալների նվազումը հունվար-սեպտեմբեր ամիսներին 43.8 տոկոս էր, նախորդ ամիս' 52.6 տոկոս:

Արդյունաբերության ոլորտում անկումը կազմում է 11.4 տոկոս, ծառայությունների ոլորտում՝ 1.4, գյուղատնտեսության ոլորտում՝ 1.3:

Արտաքին առեւտրաշրջանառության ծավալները հունվար-սեպտեմբեր  ժամանակահատվածում նվազել են 30.7 տոկոսով, իսկ նախորդ ամիս թվերն ավելի դրական էին' 29.9 տոկոս: Ընդ որում, արտահանումը նվազել է 41.5 տոկոսով, ներմուծումը' 27.7 տոկոսով:

Ի դեպ, թվերը վկայում են, որ 0.1 տոկոս նախորդ ամսվա աճի մեջ իր հիմնական դերակատարումը ունեցել է շինարարության ակտիվացումը: