Պատրաստ ենք սկսել Գյումրիի օդանավակայանի  վերանորոգման աշխատանքները. Մարտին Էռնեկյան (տեսանյութ)

Յուրաքանչյուր  երկու տարին մեկ «Կորպորասիոն Արմենիա օդանավակայաններ» ընկերությունը  ղեկավար կազմով մասնակից որևէ երկրում անցկացնում է գագաթնաժողով: Այս անգամ Հայաստանն է հանդես գալիս՝ որպես հյուրընկալող երկիր: Նպատակն է՝ միասին աշխատել և քննարկել ընկերության ռազմավարությունը:  «Կորպորասիոն Արմենիա օդանավակայաններ» ընկերության գլխավոր տնօրեն Մարտին Էռնեկյանը լրագրողների հետ զրույցում կարևորեց, որ սա ընկերության մասնակից երկրների ներկայացուցիչների համար լավագույն առիթ է մոտիկից ծանոթանալ Հայաստանին:

«Մենք հաջողակ ենք, որովհետև Հայաստանում մեծ զարգացումներ ունեցանք: Կարծում եմ, որ շարունակելու ենք օժանդակել երկրի տնտեսությանը և զարգացնելու ենք «Զվարթնոց» օդանավակայանը, որպեսզի այն ավելի լայն հնարավորություններ ունենա»,- նշեց Մարտին Էռնեկյանը՝ հավելելով, որ կաշխատեն,  որպեսզի Զվարթնոցի հին շենքը  պահպանվի:

«Կորպորասիոն Արմենիա օդանավակայաններ» ընկերության գլխավոր տնօրենի խոսքով՝ Հայաստանում մեծ խնդիրների չեն առնչվել: Իսկ նոր կառավարության հետ  էլ ամուր համագործակցություն ունեն:

Ինչ վերաբերում է Գյումրիի օդանավակայանի շենքի վերակառուցմանը, ապա Մարտին Էռնեկյանը նշեց, որ  համագործակցում են օդանավակայանի  շինարարների հետ: Նրանց համաձայնությունը ստանալուց հետո, պատրաստ են սկսել վերանորոգման աշխատանքները:

«Կորպորասիոն Արմենիա օդանավակայաններ» ընկերությունը ուղևորների սպասարկման առումով աշխարհում տասներորդն է: 2017 թվականին ընկերության օդանավակայանները սպասարկել են 77 միլիոն ուղևորի, որոնց մոտ 32,8 %-ը եղել են միջազգային փոխադրման ուղևորներ, մոտ 55, 3 %-ը ներքին չվերթների, 11, 9 %-ն էլ տարանցիկ չվերթների ուղևորներ:

Հիշեցնենք նաև, որ «Կորպորասիոն Արմենիա օդանավակայաններ» ընկերության ղեկավարության գագաթնաժողովին մասնակցել է նաև վարչապետ Նիկոլ Փաշինյանը: