Ատելության խոսք չէ․ Սարգիս Խանդանյանը՝ վարչապետի՝ «կծեփեն պատերին ու կփռեն ասֆալտին» արտահայտությունների մասին (տեսանյութ)
Աջակցիր «Ա1+»-ին«Իմ քայլը» խմբակցության պատգամավոր Սարգիս Խանդանյանը, որը ատելության խոսքի դեմ պայքարին ուղղված Հայաստանի Հանրապետության օրենսդրության բարեփոխման շուրջ քննարկումների նպատակով աշխատանքային խումբ ստեղծելու նախաձեռնությամբ է հանդես գալիս, կարծում է, որ վարչապետի՝ «կծեփեն պատերին ու կփռեն ասֆալտին» արտահայտությունները ատելության խոսք չեն։
Այս մասին խորհրդարանում ի պատասխան լրագրողի հարցի, թե վարչապետի հայտարարությունները՝ ասֆալտին փռելու հետ կապված, ատելության խո՞սք է, հնարավո՞ր է վարչապետը այս հայտարարությանհ համար դատարանի առաջ կանգնի, ասաց Սարգիս Խանդանյանը։
«Ատելության խոսքի հատկանիշներից մեկն այն է, որ այն թիրախավորված է և պարբերական բնույթ է կրում»,-նշեց նա։
Դիտարկմանը, որ վարչապետը մի քանի անգամ է նման հայտարարություն արել, Սարգիս Խանդանյանն նկատեց՝ վարչապետը խոսում է հանցագործների մասին։ Իսկ լրատվամիջնոցների վրա այս նախաձեռնությունը հնարավո՞ր է ազդեցություն ունենա։ Եթե օրինակ, լրատվամիջոցը ատելության խոսք է տարածում, ի՞նչ է լինելու այդ լրատվամիջոցի հետ, այն դիտարկվելու է ատելության խոսք տարածող, Սարգիս Խանդանյանը նշեց․
«Եթե լրատվամիջոցը ամեն օր թիրախավորված ատելության խոսք տարածի, որը նաև ռիսկ է պարունակում՝ մարդկանց դրդելու որոշակի գործողությունների, ատելության հիմքով հանցագործությունների, ապա այո, պետք է դիտարկվի, բայց գրաքննություն այս նախաձեռնությամբ չի լինի»։
