Երեխաների ծնունդներն այսօրվանից գրանցվում են «Էրեբունի» ԲԿ ծննդատանը
Աջակցիր «Ա1+»-ին
Երեխաների ծնունդներն այսօրվանից գրանցվում են «Էրեբունի» ԲԿ ծննդատանը
«Էրեբունի» ԲԿ ծննդատանը լույս աշխարհ եկած երեխաների ծնունդները կգրանցվեն տեղում՝ Քաղաքացիական կացության ակտերի գրանցման գործակալության աշխատակցի օգնությամբ: Ծննդատան առաջին հարկում հատկացված է հատուկ վայր, որտեղ ՔԿԱԳ աշխատակիցը կատարում է հետևյալ պետական գրանցումները՝
1. Երեխայի ծննդի պետական գրանցում
2. Երեխայի նկատմամբ հայրության ճանաչման պետական գրանցում
3. Ամուսնության պետական գրանցում:
Ծրագիրն իրականացնում է ՀՀ արդարադատության նախարարությունը: Նախարար Ռուստամ Բադասյանի և «Էրեբունի» ԲԿ գործադիր տնօրեն Միքայել Մանուկյանի մասնակցությամբ այսօր կատարվել է առաջին երեխայի ծննդյան գրրանցումը: Այսպիսով, երեխայի ծնվելուց հետո այլեւս կարիք չի լինի գնալ տարածքային ՔԿԱԳ՝ երեխայի ծնունդը գրանցելու համար: Գործընթացը կկատարվի ծննդատանը՝ հենց դուրսգրման օրը:
․․․․․․․․․․․․
Իդեպ այս մասին ֆբ-ի իր էջում գրել է նաև ՀՀ Արդարադատության նախարար Ռուստամ Բադասյանը․
Սիրելի՛ կանայք,
Ի սրտե շնորհավորում եմ բոլորիդ Մարտի 8-ի կապակցությամբ: Կյանքի բոլոր փուլերում Ձեր ունեցած կարևոր դերակատարության մասին նշելու անհրաժեշտությունը չկա. դա աքսիոմ է: Ապացուցման կարիք չունի նաև այն, որ մեր Կառավարությունն անում ու շարունակելու է անել առավելագույնը՝ Ձեր հոգսերը թեթևացնելու ուղղությամբ:
✅Այս առումով, օրվա խորհրդով նաև պայմանավորված, լավ լուր ունեմ Ձեր և Ձեր ընտանիքի անդամների համար: Այսօր մեկնարկեցինք մի ծրագիր, որն ուղղված է հանրային ծառայությունները մեր բնակչությանն առավել հասանելի դարձնելուն:
✅Այսուհետ, Երևան քաղաքում ամենամեծ թվով ծննդօգնություն իրականացնող կազմակերպություններում երեխաների ծնունդները կգրանցվեն տեղում և կկատարվեն դրանից բխող օրենսդրությամբ նախատեսված այլ գործառույթներ:
Ծրագրի առաջին փուլին միացած բժշկական կազմակերպություններն են՝ Էրեբունի բժշկական կենտրոնը (ծննդատուն), Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտը ու Մոր և մանկան առողջության պահպանման գիտահետազոտական կենտրոնը:
