«Երկու շաբաթ հետո Վանաձորում կորոնավիրուսի լուրջ թվեր կարող ենք ունենալ» (տեսանյութ)

Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը ԱԺ արտահերթ նիստի ընթացքում անդրադարձավ Վանաձորի «Գլորիա» կարի արտադրամասի աշխատակիցների բողոքի ակցիային:

«Ապրիլի 11-ին ուղիղ եթերում վարչապետը ասաց, որ ապրիլի 20-ից տեքստիլ ոլորտը կվերագործարկվի, և մարդիկ կսկսեն աշխատել, որից հետո ապրիլի 15-ին Խորհրդարանում իմ հարցին ի պատասխան վերահաստատեց։ Վանաձորում «Գլորիա» ֆաբրիկայի աշխատողները երեկ գնում են աշխատանքի, ոստիկանությունը գնում է և այս մարդկանց նկատմամբ սկսում է վարչական արձանագրություններ կազմել և տուգանել: Արդյունքում ունենք իրավիճակ, որ պարետատան մակարդակովէ նույն  հայտարարությունն արվել է, բայց մարդիկ գնում են աշխատանքի, մարդկանց սկսում են տուգանել: Այն մարդիկ են, ովքեր որևէ սոցիալական ծրագրով աջակցություն չեն ստացել: Ժողովրդի ասած՝ կարկուտը ծեծած տեղն է ծեծում»:

Մարուքյանի խոսքով՝ ստեղծվել է քաոսային իրավիճակ, տեղաշարժման թերթիկն էլ դարձել է անիմաստ բյուրոկրատիա, թուղթը չունեն, 100 հազար դրամ տուգանում են:

Մարուքյանը նշեց, որ խոսքը 2600 մարդու մասին է, ովքեր հացի փող աշխատելու խնդիր ունեն, հորդորեց նաև երեկ կազմված արձանագրությունները չեղարկել:

«Իմ քայլը» խմբակցության պատգամավոր Հովհաննես Իգիթյանը ևս անդրադարձավ Վանաձորի դեպքին: Պատգամավորն արձանագրեց՝ մարդիկ հավաքված են մի տեղ և պահանջում են աշխատանք.

«Վրաստանում աշխատանքը չի վերահսկվում այնպես, ինչպես մեզ մոտ, որովհետև նրանք հասցեական ձևով չգիտեն, թե որտեղից է գալիս վարակը, մենք կարող ենք հայտնվել այդպիսի իրավիճակում: Այն, ինչ մենք տեսանք երեկ Վանաձորում, կարող է այդպիսի իրավիճակ ստեղծել մեր մեծ քաղաքում»:

Ըստ Իգիթյանի՝ երկու շաբաթ հետո մենք Վանաձորում կորոնավիրուսի լուրջ թվեր կարող ենք ունենալ:

Հիշեցնենք, որ երեկ Վանաձորի «Գլորիա» կարի ֆաբրիկայի աշխատակիցները գործարան էին գնացել, պահանջում էին աշխատել: Աշխատակիցներին բարկացրել էր այն, որ ֆաբրիկայի ղեկավարությունը որոշել է ևս 1 ամսով երկարացնել աշխատանքի դադարը։ Դեպքի վայր էին ժամանել նաեւ ոստիկանները։ Աշխատակիցներից մի քանիսը բերման են ենթարկվել։