ՀՀ-ում չկա մի կինոթատրոն, որտեղ հայերեն լեզվով արտասահմանյան ֆիլմ գնա. Արթուր Մանուկյան (տեսանյութ)
Աջակցիր «Ա1+»-ին«Ես շատ մարդիկ գիտեմ, որ երբեք օպերայում, թատրունում ու որևէ սիմֆոնիկ համերգի իրենց կյանքի ընթացքում չեն եղել, բայց չեմ կարողանում մտաբերել մեկի, ենթադրել, որ կարող է կինոթատրոնում եղած չլինի»,- այսօր իր ելույթում ասաց ԱԺ «Իմ քայլը» խմբակցության պատգամավոր Արթուր Մանուկյանը։
Նրա խոսքով՝ արվեստների մեջ կինոն շատ հատուկ տեղ ունի և ֆիլմ նայել ու նայում են բոլորը։ Ըստ պատգամավորի այսօր մենք շատ տարօրինակ խնդիր ունենք կապված կինոթատրոնների հետ․ «ՀՀ-ում ըստ սահմանադրության հայերենն համարվում է պետական լեզու, բայց, ՀՀ-ում չկա մի կինոթատրոն, որտեղ հայերեն լեզվով արտասահմանյան ֆիլմ գնա․ լրիվ գնում են ռուսերեն լեզվով»,- ասում է նա։
Արթուր Մանուկյանը շեշտում է, որ կինոարտադրությունը շատ թանկ ոլորտ է և արվեստը անհնար է նայել ֆինանսական տեսանկյունից․ «Մենք շատ վախվորած օրենք ենք գրել ֆինանսական և հարկերի հետ կապված՝ համեմատած մյուս օրենքների հետ։ Արվեստը անհնար է նայել ֆինանսական տեսանկյունից։ Այստեղ ֆինանսիստները չեն կարող չափել, դա անհնարին է, ես ձեր չափումները չեմ ընդունում և վերջ»։
Հիշեցնենք, որ քննարկվում է ՀՀ ԱԺ պատգամավորներ Աննա Կոստանյանի, Մխիթար Հայրապետյանի, Վահագն Թեւոսյանի, Արթուր Մանուկյանի եւ Արման Եղոյանի հեղինակած «Կինեմատոգրաֆիայի մասին» օրենքի նախագիծը՝ կից օրենսդրական փաթեթով:
Ըստ հեղինակների՝ «Կինեմատոգրաֆիայի մասին» օրենքի նախագծի ընդունումը, որով նաեւ հարկային արտոնություններ են տրվելու կինոյի ոլորտին, նպաստելու է կինոարտադրության զարգացմանն ու ներդրումների ներգրավմանը:
ՀՀ ԿԳՄՍ նախարարի տեղակալ Արայիկ Խզմալյանը ներկայացրել է Կառավարության կարծիքը՝ տեղեկացնելով, որ Կառավարությունն ունի որոշ առարկություններ եւ առաջարկներ, որոնց թվում է նաեւ կինոոլորտին հարկային արտոնությունների տրամադրման նպատակահարմարությունը: Ըստ նրա՝ անհասկանալի է, թե ինչու պետք է առանձնահատուկ մոտեցում ցուցաբերվի կինոյի ոլորտին:
Քննարկումը շարունակվում է։
