Բացել լրահոսը Փակել լրահոսը
A A

«Քաջազի մշտավառ կանթեղը»

Մշակույթ

ՀՀ սփյուռքի նախարարությունը իրականացնում է «Ակնարկներ սփյուռքահայ կերպարվեստի պատմությունը» մատենաշարքի հրատարակչութունը` նվիրված սփյուռքահայ արվեստագետների ստեղծագործություններին:

Շարքի առաջին հատորը` «Քաջազի մշտավառ կանթեղը», նվիրված էր նկարիչ Քաջազնունի Քեչեչյանին: Գրքի հեղինակ, արվեստագիտության պրոֆեսոր Արարատ Աղասյանը մանրամասն անդրադարձել է նրա կյանքին եւ արվեստի ժառանգությանը: Գիրքը ունի նաեւ անգլերեն տարբերակը, որը կատարել է ամերիկահայ ճանաչված թարգմանիչ` Արիս Սեւակը:

Գրքի շնորհանդեսը Նյու Յորքում կազմակերպել էր Համազգայինի հայ կրթական եւ մշակութային միությունը: Օրվա հանդիսավար Արմինե Մինասյանը հակիրճ ներկայացրեց նկարչի ստեղծագործական ուղին:

1974 թվականին Քեչեչյանների ընտանիքը մշտական բնակություն է հաստատում ԱՄՆ-ում, որտեղ նկարիչը նոր եռանդով սկսում է ստեղծագործել: 1994 թվականին Եվրոպայի գեղարվեստի մրցությանը ավանգարդ նկարիչների աշխատանքների մրցույթում նրա «Սումգայիթ» կտավը արժանանում է առաջին մրցանակի:

Բազմաթիվ միջազգային մրցանակների է արժանացել Քաջազը: Նրա կտավները հանգրվանել են Հայաստանի, ԱՄՆ-ի, Լիբանանի, Ֆրանսիայի, Իտալիայի ցուցասրահներում:

Երեկոյի ընթացքում ցուցադրվեցին Քաջազի աշխատանքները, որի ընթացքում մեկնաբանություններով հանդես եկավ նկարչի կինը` բանասեր Սաթենիկ Քեչեչյանը:

Քաջազի մասին իրենց հուշերը ներկայացրեցին բանասեր Ջուլիետա Ստեփանյանը եւ ամերիկահայ անվանի գրող- դրամատուրգ` Հրանտ Մարգարյանը:

Երեկոն անցավ ջերմ մթնոլորտում:

Ռոբերտ Կարապետյան
Նյու Յորք
Լուսանկարները` հեղինակի