«Ոչ մի խոսք չի կարող գնալ որևէ բիոլոգիական կամ այլ զենքի մասին, քանի որ սա հայտնի օջախներից է, որն արտացոլվում է մեր սեյսմակտիվ քարտեզում որպես վտանգավոր գոտի։ Այն, ինչ տեղի է ունեցել, դա լրիվ բնական երևույթ է»,- անդրադառնալով փետրվարի 13-ին տեղի ունեցած 4.7 մագնիտուդ ուժգնությամբ երկրաշարժին`  ասում է  սեյսմոլոգ, ՀՀ ԱԻՆ «Սեյսմիկ պաշտպանության տարածքային ծառայություն» ՊՈԱԿ-ի տնօրենի ժ/պ Սոս Մարգարյանը։

«Ունենք հետցնցումային սեյսմիկ ակտիվություն։ Մենք այս պահին ունենք ավելի քան 110 հետցնցում, բայց գնալով դրանք նվազում են»,- ասաց նա։

ՀՀ Քաղաքաշինության պետական կոմիտեի շինարարության և գիտատեխնիկական նորմավորման վարչության պետ Ռուզաննա Ադամյանը նշում է, որ ՀՀ տարածքը, կամ տարածքի մեծ մասը միջին կամ բարձր վտանգի գոտում է․ «Հուսով եմ, որ նոր կառուցված շենքերը, վերջին գոնե տասնամյակում, բավականաչափ պետք է ամուր, ապահով և անվտանգ լինեն մեր բնակչության համար։

Կան վերահսկողական-տեսչական մարմիններ, սակայն մոտ 20 տարի է, ինչ գործում են մասնավոր ընկերություններ լիցենզավորված, բայց դեպքեր են եղել, երբ փորձաքննությունը ոչ բավարար մակարդակով է իրականացվել։  Դրա համար 100 տոկոսով հավաստիացնել, որ շենքերն ու շինությունները որակ են ապահովում, ես այս պահին չեմ կարող։ Բայց վերջին կառուցապատումները նոր տեխնոլոգիաների կիրառմամբ են իրականացվել, կարծում եմ բավականաչափ անվտանգ են»,-ասաց նա։

Անդրադառնալով վերը նշված խնդիրներին՝ ճարտարապետ Սարհատ Պետրոսյանը  շեշտում է, որ խնդիրն այն է, որ պատշաճ վերահսկողություն չի եղել և բարեփոխումները, որոնք պետք է շարունակական լինեին, հատկապես վերջին 2 տարիներին հետընթաց է լինում․ «Դժբախտաբար պետք է ասեմ, որ ներկա պրոցեսները, որ ես տեսնում եմ, ոչ միայն բարեփոխումներ չեն լինելու, այլ նաև հետընթաց ենք ունենալու։ Այս պահին գոնե ես վատատես եմ, քանի որ  հիմա սխալ, ոչ մասնագիտական մոտեցումներ են այս ոլորտում»,- ասաց նա։

Խնդիրները լուծելու համար, նրա խոսքով,  պետք է հասկանալ ոլորտից ինչ ենք ուզում։

Ըստ նրա՝  սա խորքային խնդիր է․ «Համակարգը, խնդիրները լուծելու համար պետք է ամբողջովին վերանայվի, պետք է շրջանառության մեջ մտնի քաղաքային պլանավորում եզրույթը։ Պլանային գործընթացում մենք առհասարակ որևէ  քաղպաշտպանության գործընթացի պատրաստ չենք»,- նշում է Սարհատ Պետրոսյանը։

Խոսելով արտակարգ իրավիճակներում բնակչության վարքագծի,  վարքականոնների իրազեկվածության մասին, Սոս Մարգարյանը նշում է,  որ իրենք պարբերաբար իրականացրել և իրականացնում են վարքականոնների ուսուցում՝ ամբողջ ՀՀ-ի դպրոցներում․ «Մեր մենտալիտետի համաձայն, երբ չունենք կրիտիկական իրավիճակ, այդ գիտելիքները կարծես թե ոչ մեկին առանձնապես պետք չեն։ Վերջին օրերին տարբեր ահազանգեր ենք ստանում, նույնիսկ տարբեր մասնավոր համալսարաններից, որպեսզի իրենց համար կազմակերպենք այդ դասընթացները։ Դա բնութագրում է մեր մտածելակերպը»,-ասաց նա։

Մանրամասները՝ տեսանյութում