Ժամանակն է պատերազմին նախորդած ողջ բանակցային գործընթացը դնել սեղանի վրա․ Ռուբեն Մեհրաբյան
Աջակցիր «Ա1+»-ինՏարբերություն չկա, թե ինչ է խոսում Սերժ Սարգսյանը և ինչու։ Չեմ կարծում Սերժ Սարգսյան քննարկելն այլևս իմաստ ունի։
«Ա1+»-ի հետ զրույցում նման տեսակետ արտահայտեց քաղաքագետ Ռուբեն Մեհրաբյանն՝ անդրադառնալով Սերժ Սարգսյանի երեկվա հարցազրույցում արցախյան բանակցությունների շուրջ ներկայացրած պարզաբանումներին։
«Հիմա Սերժ Սարգսյան կարող է ինչպես ուզի, ինչ ուզի, ինչքան ուզի խոսի և դրանից միևնույն է ոչինչ չի փոխվում։ Մենք ունենք այն, ինչ ունենք։ Այն, ինչ ունենք եղել է նախ և առաջ իր նախորդի տասնամյա կառավարության և իր տասնամյա կառավարության արդյունքում։ Այսքանը պարզից էլ պարզ է»,-ասաց քաղաքագետը։
Նիկոլ Փաշինյա՞նն է մանիպուլացնում արցախյան բանակցային գործընթացը, թե Սերժ Սարգսյանը՝ հաշվի առնելով, որ երկուսն էլ խոսում են ներկայացնելով հակափաստարկներ։ Հարցին քաղաքագետն այսպիսի պատասխան տվեց․
«Ես կարծում եմ՝ ժամանակն է բոլորի կողմից պատերազմին նախորդած ողջ բանակցային գործընթացը ուղղակի տեքստով դնել սեղանի վրա։ Եվ խոսակցությունները դրանով կվերջանան։ Սա է իմ մոտեցումը։ Պարզից էլ պարզ է՝ մանիպուլյացիային վերջ տալու լավագույն կարճ ճանապարհը սա է»,- ասաց Ռուբեն Մեհրաբյանը։
Քաղաքագետից փորձեցինք ճշտել, թե ինչ նկատի ուներ Սերժ Սարգսյանը, երբ ասում էր, որ ծայրահեղ անհրաժեշտության դեպքում կարող է հանրայնացնել նաև բանակցային գործընթացից որոշ մանրամասներ, Ռուբեն Մեհրաբյանն այսպես արձագանքեց․
«Էլ ինչ ծայրահեղ դեպք է ուզում լինի։ Այն ինչ տեղի ունեցավ, դրանից հետո էլ ինչ ծայրահեղ դեպք։ Չգիտեմ, կարող է իր համար իր քրեական գործի հետ կապված է, ես չգիտեմ»։
Հիշեցնենք՝ երեկ իր ծավալուն հարցազրույցում ՀՀ երրորդ նախագահ Սերժ Սարգսյանը խոսել է ԼՂ հիմնախնդրի բանակցային գործընթացի վերաբերյալ և մանրամասներ ներկայացրել։
