Ֆրանկոֆոնիայի ժամանակ հասկացա, որ այստեղ մարդիկ սիրով են լցված. Զազ (տեսանյութ)
Աջակցիր «Ա1+»-ինՖրանսիացի երգչուհի Zaz-ը ուրախ է, որ կրկին Հայաստանում է։ Այսօր նա հանդիպեց լրագրողների հետ։
«Անսպասելի է տեսնել այսքան տեսախցիկներ։ Ուրախ եմ և հուզված, որ Շառլ Ազնավուրի հայրենիքում եմ,- ասաց ժպտադեմ Zaz-ն ու կատակեց․- Ես նրա խորհուրդներից հատկապես մեկն եմ լավ հիշում, որ անգլերեն լավ սովորեմ, սակայն մինչև հիմա դա չեմ արել»։
Նշեց նաև, որ սիրում է հայկական դուդուկը և հաճախ լսում է դուդուկահար Լևոն Մինասյանի ձայնասկավառակը, ու հատկապես «Երազ»-ը։ Երբ հոգնած է, միացնում է այդ երգն ու էներգիայով լցվում։
«Հայտնի լինելը ինչ-որ չափով սահմանափակում է ազատությունը, բայց փոխարենը զբաղվում ես սիրելի գործով։ Գումարն էլ այդքան կարևոր չէ մարդու կյանքում։ Բայց կարևոր է այնքանով, որ գումարի շնորհիվ կարող եմ իրականացնել նախագծերը, մասնավորապես իմ փառատոնը։ Շատ բան չեմ հասցրել տեսնել Երևանում։ Սակայն դեռ Ֆրանկոֆոնիայի ժամանակ հասկացա, որ այստեղ մարդիկ սիրով են լցված»,- պատասխանելով բազմաբնույթ հարցերին ասաց երգչուհին։
Հիշեցնենք, որ Zaz-ի համերգը կկայանա վաղը «Հրազդան» մարզադաշտում, «Հայա» փառատոնի շրջանակում:
