Ucom ընկերության աջակցությամբ Հայաստանում կմեկնարկի հերթական «Արևորդի» փառատոնը

Մայիսի 24-28-ը Երևանում Ucom ընկերության աջակցությամբ տեղի կունենա «Արևորդի» 12-րդ միջազգային բնապահպանական փառատոնը, որն այս տարի կանցկացվի «Կենսաբազմազանություն. բնության զարկերակը» խորագրի ներքո։

Նախորդ փառատոնների ընթացքում ցուցադրվել է 150 երկրներից ավելի քան 780 ֆիլմ, և այս տարի էլ լինելու են 30 ցուցադրություններ՝ ընդգծելու բնապահպանական գիտակցության բարձրացման կարևորությունը և կինեմատոգրաֆիայի ուժն այդ հարցում:

Ֆիլմերը կմրցեն հետևյալ 4 անվանակարգերում՝ Ֆիլմեր բնապահպանների մասին, Լիամետրաժ դոկումենտալ ֆիլմեր կենսաբազմազանության պահպանության մասին, Կարճամետրաժ ֆիլմեր կենսաբազմազանության պահպանության մասին, Ֆիլմեր՝ նկարահանված երիտասարդների և երեխաների կողմից/համար բնապահպանության մասին։

«Ucom-ի համար, որպես կանաչ ընկերություն, շրջակա միջավայրի պահպանությունը շատ կարևոր արժեք է, և երիտասարդների տեղեկացվածությունն այս ուղղությամբ մեր բնությունն ու մոլորակը փրկելու լավագույն ճանապարհն են։ Մենք մեծ սիրով աջակցում ենք փառատոնին, վստահ լինելով, որ մասնակցող երիտասարդները մեզ նման կդառնան այս արժեքների կրողներն ու կնպաստեն Հայաստանում կայուն ապագայի կառուցմանը», - նշել է Ucom ընկերության գլխավոր տնօրեն Ռալֆ Յիրիկյանը։

«Արդեն տարիներ շարունակ Արևորդին մեր հանրությանը հաղորդակից է դարձնում համաշխարհային բնապահպանական մարտահրավերներին, ծառայում՝ որպես կայուն կենսակերպի ջատագով՝ այդ ամենն անելով արվեստի միջոցով։ Փառատոնի գոյության տարիների փորձը ցույց է տվել, որ սա լավագույն ձևն է՝ խոսելու բարդ և երբեմն անհաղթահարելի թվացող խնդիրների մասին։ Մեր բազմազան միջոցառումների միջոցով փորձելու ենք թիրախավորել դպրոցականներից մինչև մեծահասակների՝ միավորելով բոլորին մեկ ընդհանուր գաղափարի շուրջ՝ լինել ներդաշնակ բնության հետ», - ասել է Սոնա Քալանթարյանը, «Արևորդի» միջազգային փառատոնի տնօրենը։

Ուշադրության կենտրոնում պահելով երիտասարդներին՝ փառատոնի շրջանակում կազմակերպվել է երիտասարդական անկյան 2 գոտի։

Առաջին գոտում կլինի ցուցահանդես-էքսպո, որտեղ կներկայանան բնապահպանական կրթության, երիտասարդների ներգրավման հարցերով զբաղվող առաջատար կազմակերպություններ՝ ներկայացնելով իրենց ծրագրերը, հաջողությունների պատմություններն ու համագործակցության հնարավորությունները։ Ցուցահանդես-էքսպոյի կազմակերպումը նպատակ է հետապնդում հարթակ ստեղծել ինչպես ոլորտային կազմակերպությունների միջև կապեր ստեղծելու, փորձի փոխանակման, այնպես էլ երիտասարդներին ոլորտում առկա հնարավորությունների մասին իրազեկելու համար։

Երիտասարդական անկյան երկրորդ գոտում իրականացվելու են աշխատարաններ, գործնական աշխատանքներ, ինտերակտիվ քննարկումներ այնպիսի արդիական թեմաների վերաբերյալ, ինչպիսիք են՝ «Կայուն նորաձևություն և տեքստիլ», «Քաղաքային այգեգործություն», «Ձրի շուկա», «Կլիմայական արդարություն» և այլն։ Թեմատիկ ինտերակտիվ քննարկումներից և գործնական աշխատանքներից հետո տեղի է ունենալու ֆիլմերի դիտում։

Մայիսի 24-ին 28-ը կլինեն «Փխրուն տարածություն» և բնապահպանական պաստառային արվեստի ցուցահանդես։ Առանցքային թեման մարդկային գործունեության ու շրջակա միջավայրի միջև նուրբ ներդաշնակությունն է։ Մասնավորապես, ներկայացված աշխատանքները բարձրաձայնելու են բնապահպանական այն վտանգները, որոնց առջև այսօր կանգնած է մեր մոլորակը։ Նմուշները ներառում են վիդեո ինստալացիաներ, տեղեկատվական էկրաններ, արհեստական բանականության գեներացրած պատկերներ, վերամշակված նյութերից պատրաստած քանդակներ, պաստառներ և այլն։ Դրանց հեղինակներն են Ալեքս Ֆրոստը, Ալեքսեյ Մանուկյանը, Լիլիթ Ստեփանյանը, Տի Կոստանը, Դան Պերյովշին, Դավիթ Գալստյանը, Վահան Խաչատրյանը, Գրիգոր Խաչատրյանը, Գեղամ Սարգսյանը։

Մայիսի 26-ին փառատոնի մասնակիցները, պատանիներն ու երիտասարդները հնարավորություն կունենան մասնակցելու իրական տոնախմբության՝ «Կենդանիների դիմակահանդես-շքերթին»։ Ավելի քան 400 երիտասարդներ ողջ Հայաստանից կներկայանան իրենց կողմից թափոններին «երկրորդ կյանք» տալու արդյունքում ստեղծված զգեստներով, դիմակներով՝ մարմնավորելով տարբեր վտանգված կենդանա/բուսատեսակներ և հանդես գալով կարևոր բնապահպանական ուղերձներով։ Բոլոր մասնակիցներն իրենց ստեղծած գունագեղ կոստյումներով մի քանի ժամ շարունակ քայլերթ կիրականացնեն Երևանի կենտրոնական փողոցներով՝ բնակիչներին ևս իրազեկելով թեմայի հրատապության և արդիականության մասին։ Ամենաստեղծարար 5 խմբերը կստանան խրախուսական մրցանակներ։

Մայիսի 24-28-ին Կինոյի տանը այցելուների համար բաց կլինի նաև վայրի բնության լուսանկարիչ Բեռտա Մարտիրոսյանի անհատական «Հայաստանի կենսաբազմազանությունը» ֆոտոցուցահանդեսը, որը հանդիսատեսին կներկայացնի Հայաստանում հանդիպող ամենատարբեր թռչունների, կաթնասունների, միջատների ու սողունների։

«Արևորդի» 12-րդ միջազգային բնապահպանական փառատոնի իրականացմանը աջակցել են նաև Երևանի քաղաքապետարանը, ԱՄՆ անտառային ծառայությունը, Վայրի բնության և մշակութային արժեքների պահպանման հիմնադրամը և Բրիտանական խորհրդի հայաստանյան գրասենյակը։