Ընդդիմությունը խաբել է սեփական հետևորդներին, թե այս ուղերձի քննարկումով որևէ բան է փոխվելու․ Կոնջորյան

Խորհրդարանական ընդդիմությունը շատ լավ գիտի, որ ուղերձի նախագծով հնարավոր չէ հասնել հրաժարականին: Դրա մասին գիտի նաև Բագրատը: Միակ չիմացողը` իրենց աջակիցներն են: Ուրեմն նրանց է պետք խաբել: Այս մասին Facebook-ի իր էջում գրել է ՀՀ Ազգային Ժողովի «Քաղաքացիական պայմանագիր» խմբակցության ղեկավար Հայկ Կոնջորյանը։

«Մի քանի հետաքրքիր փաստ՝ խորհրդարանական ընդդիմության այսօրվա արկածների և իրական ծրագրի մասին:

Ինչպես գիտեք, խորհրդարանական ընդդիմությունը` իր վեղարով առաջնորդով հանդերձ, հայտարարել է, որ ԱԺ հուժկու նիստ է հրավիրելու և հասնելու է կառավարության հրաժարականին:

Այդ հուժկու սպառնալիքից հետո, ընդդիմությունը ներկայացրել է ԱԺ ուղերձի նախագծով նիստ հրավիրելու առաջարկ, որը ոչ մի իրավաբանական պարտադիր ուժ չունի, եթե անգամ ընդունվի: Ուստի, ընդդիմությունը խաբել է սեփական հետևորդներին, թե այս ուղերձի քննարկումով որևէ բան է փոխվելու:

Համաձայն ԱԺ կանոնակարգ օրենքի, այսօր գումարվել է ԱԺ գլխադասային հանձնաժողովի նիստ, որտեղ ընդդիմությունը պետք է գնար և ներկայացներ իր այդքան ցանկալի ուղերձը, որից հետո հանձնաժողովը պետք է քվեարկեր կողմ կամ դեմ: Սա ընդդիմության համար վճռական պահ էր:

Հանձնաժողովի նիստը գումարվել է, և դրանից մի քանի ժամ առաջ` ըստ կարգի, պատգամավորները ծանուցվել են նիստի անցկացման ժամի մասին (նամակները առկա են):

ԱԺ կանոնակարգ օրենքի համաձայն, հանձնաժողովի նիստ կարող է գումարվել ԱԺ լիագումար նիստերի ժամանակ, եթե հանձնաժողովի նիստը լիագումար նիստին զուգահեռ չի ընթանում: Հանձնաժողովի նիստը գումարվել է ժամը 16:00-ին` ԱԺ ընդմիջման ժամին: Կրկնում եմ` մի քանի ժամ առաջ բոլորը ծանուցվել են նիստի մասին:

Հիմա՝ ուշադրություն

Ժամը 16:00-ի ընդմիջումից առաջ, երբ մենք քննարկում էինք ոստիկանության գվարդիայի մասին օրենքի նախագիծը, ընդդիմության պատգամավորներից ոչ ոք դահլիճում չէր: Հանկարծ, ընդմիջումից րոպեներ առաջ, անակնկալ կերպով դահլիճ է մտնում Արծվիկ Մինասյանը և գրանցվում է հարց տալու, հետո` ելույթ ունենալու համար:

Ժամը 16:00-ին հանձնաժողովի նիստը մեկնարկում է առանց Արծվիկ Մինասյանի, ով իրենց` տիեզերական կարևորության ուղերձի հիմնական զեկուցողն է, մի ուղերձի, որը, ըստ իրենց հայտարարությունների, բերելու է կառավարության հրաժարականին և «փրկելու» է բոլորին` ծայրից-ծայր:

Եվ ահա այդ վճռական պահին, Արծվիկ Մինասյանը հանկարծ որոշում է, որ պետք է վերադառնա նիստերի դահլիճ, անտեր թողնի իրենց միջմայրցամաքային ուղերձը և փոխարենը հարց և ելույթ գրանցվի` մեկ այլ օրենքի նախագծի համար:

Համաձայնեք, որ սա առնվազն տարօրինակ է: Բայց իրականում, այս փոքրիկ խորամանկությունը պետք է դառնա Արծվիկ Մինասյանի ալիբին, ուղերձի հարցով հանձնաժողովի նիստին չգնալու համար: Դրա համար նա աճապարելով վերադարձավ նիստերի դահլիճ` մեն մենակ:

Արդեն ժամը 16:30-ին` ԱԺ հայտարարությունների ժամին, մենք հայտարարում ենք, որ ընդդիմությունը չի եկել հանձնաժողովի նիստին` տապալելով սեփական այդքան կարևոր ուղերձի քննարկումը, որին մեզ հրավիրում են հենց իրենք:

Հետո, Արծվիկ Մինասյանը հայտարարում է, որ ինքը կարևոր հարց ուներ տալու այլ օրենքի նախագծի վերաբերյալ, դրա համար չի գնացել հանձնաժողովի քննարկմանը: Իսկ ավելի ուշ, Բաղրամյան պողոտայում ելույթ ունենալով` սեփական աջակիցներին մոլորեցնում է` հայտարարելով, թե իբր իրենք տեղյակ չեն եղել հանձնաժողովի նիստի մասին և նիստը ապօրինի է եղել:

Կրկնում են` նիստի ժամը ծանուցվել է մի քանի ժամ առաջ և կանոնակարգ օրենքով այն լիովին օրինական է, իսկ Արծվիկ Մինասյանն այդ մասին հրաշալի գիտի:

Հիմա ամենակարևոր հարցը` ինչու՞ է ընդդիմությունը ստում իր աջակիցներին և բոլորին:

Խորհրդարանական ընդդիմությունը շատ լավ գիտի, որ ուղերձի նախագծով հնարավոր չէ հասնել հրաժարականին: Դրա մասին գիտի նաև Բագրատը: Միակ չիմացողը` իրենց աջակիցներն են: Ուրեմն նրանց է պետք խաբել:

Եվ Բագրատն ու ընդդիմությունը կիրակի օրը ծրագրում են հետևյալը` մարդկանց պետք է բերել ԱԺ, պահել մի քանի օր և տանել բախումների: Բայց մինչ այդ, պետք է գործընթացը տաքացնել, որ մարդիկ մի քանի օր այնտեղ մնալու և կռիվ տալու էմոցիոնալ և լեգիտիմ առիթ ունենան: Դրամատիզմ ավելացնելու համար պետք է սկսել հետհաշվարկ` 96 ժամ:

Իսկ բովանդակությամբ իրավիճակը տաքացնելու համար պետք է նախաձեռնել իմփիչմենթի կեղծ գործընթաց, քանի որ իրական իմփիչմենթի համար անհրաժեշտ ձայներ չունեն: Կեղծ իմփիչմենթը` ուղերձն է:

Բայց այսօր ի՞նչը այնպես չգնաց այս պատմության մեջ:

Ընդդիմությունը չեր սպասում, որ ԱԺ հանձնաժողովի նիստը կնշանակվի հենց այսօր և մտածում էր, որ դեռ կարող է 96 ժամի մնացած ընթացքը օգտագործել կեղծ իմփիչմենթի փուչիկը փչելու համար:

Մենք հանձնաժողովի նիստը նշանակեցինք այսօր, որից ընդդիմությունը անակնկալի եկավ` եթե գնար նիստին, փաստարկների դաշտում ջախջախվելու էր, որից հետո իշխող խմբակցությունը դեմ էր քվեարկելու:

Այդ դեպքում փուչիկը այսօր պայթելու էր, քանի որ բոլորը հասկանալու էին, որ դեմ քվեարկությամբ կառավարող խմբակցության որոշումը ամրագրվել է: Արդյունքում, Բագրատ & CO-ն չէր կարողանալու համոզեր սեփական հետևորդներին, որ ՔՊ պատգամավորներին կարող են պարտադրել հունիսի 17-ին գալ նիստի, եթե ճնշումը ավելացնեն ու ավելի շատ մարդ հավաքեն: Իսկ հիմա կարող են ասել` մեզանից թաքուն հանձնաժողովի նիստ արեցին, վախեցան, դրա համար եկեք վաղը ավելի շատով հավաքվենք, որ ավելի շատ ճնշենք ու պարտադրենք գալ նիստին:

Նիստին, որը չի լինելու:

Պլանը սա է. այս ֆարսի միջոցով հնարավորինս շատ մարդ հավաքել Ազգային ժողովի դիմաց, բախումներ հրահրել ու ստեղծել քաոս: Եթե հաջողվի իշխանությունը զավթել, ապա կիրագործվի իրենց հայաստանյան և ոչ հայաստանյան տերերի դիվային ծրագիրը: Եթե չհաջողվի, ընդդիմությունը երեսը կփրկի` ասելով, որ ինքը նախաձեռնեց հրաժարականի գործընթաց, բայց դավաճան իշխանությունը չմիացավ դրան:

Բագրատը կասի, որ բիրտ ոստիկանությունը ճնշեց ժողովրդի կամքը:

Ընդդիմադիրները կվերադառնան ԱԺ և խելոք կծվարեն իրենց կաբինետնորում ու կմասնակցեն գործուղումներին: Բագրատը կգնա վանք ու կքնի մի բոլ: Իսկ ահա այն մարդիկ, ովքեր հավատացել էին այս ֆարսին, կմնան ձեռնունայն, հուսալքված և խաբված:

Ահա սա է ստի և կեղծիքի մեկամսյա մարաթոնի ողջ պերճանքն ու թշվառությունը»,- գրել է Կոնջորյանը:

Ավելի վաղ հայտնել էինք, որ Ազգային ժողովի պետական-իրավական հարցերի մշտական հանձնաժողովը մինչև երկու ամսով հետաձգել է «Կառավարության հրաժարականի և նոր կառավարություն ձևավորելու անհրաժեշտության մասին» ԱԺ ուղերձի նախագիծը։