Վստահեցնում եմ, որ բարձրաստիճան պաշտոնյաներն առայսօր տուգանվում են․ Արմեն Մկրտչյան (տեսանյութ)
Աջակցիր «Ա1+»-ին«Ի տարբերություն նախորդի՝ նոր ռազմավարության մշակման մեջ քաղաքացիական հասարակության մասնակցությունը եղել է անմիջական և էական։ Բայց հիմա ակնկալում ենք, որ ընդունված փաստաթուղթը իրականություն դառնա»,- «Ա1+»-ի ուղիղ եթերում «Հանրային լրագրության ակումբի» կազմակերպած քննարկման ժամանակ ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ անդրադառնալով Ոստիկանության 2024-2026թթ․ բարեփոխումների ռազմավարությանը։
Արթուր Սաքունցն անբավարար գնահատեց Ոստիկանության 2020-2022թթ․ բարեփոխումների ռազմավարության իրականացումը՝ համարելով, որ այն հատվածային է եղել։ Նրա գնահատմամբ` եթե պարեկային ծառայության ստեղծումը դրական երևույթ է, ապա քրեական ոստիկանությունն ընդհանրապես չի բարեփոխվել։ «Չի կարող բարեփոխում լինել, բայց Ոստիկանության բաժիններում բռնության դեպքեր, ճնշումներ լինեն։ Շատ վատ է իրականացվում նաև բարեփոխումների մասին հանրային իրազեկումը»,- ասաց Արթուր Սաքունցը։
Քննարկմանը ներկա՝ Ներքին գործերի փոխնախարար Արմեն Մկրտչյանն, իհարկե, ձեռքբերում համարեց նախորդ փուլում ՀՀ ողջ տարածքում պարեկային ծառայության գործարկումը և Ներքին գործերի նախարարության ձևավորումը։ Եվ ընդգծեց, որ երկրորդ ռազմավարության կարևոր նպատակներից է արդեն ոստիկանության և մասնագիտական, և բարեվարքության, և այլ կարողությունների բարձրացումը։ «Այդ նպատակով մենք արդեն ունենք միասնական կրթահամալիր, որը կրթական նոր միջավայր կձևավորի»,- հավելեց փոխնախարարը։
Պատասխանելով՝ ոստիկանության Լոռու մարզային վարչությունում Տիգրան Ուլուբաբյանի նկատմամբ ենթադրյալ բռնությանը՝ Արմեն Մկրտչյանն ասում է, արցախցի երիտասարդի հայտարարության մեջ նկարագրվում է տևական, պարբերական ծեծի, խոշտանգման, մարմնական հետևանքներով վնասվածքների մասին, բայց իրենք դա չեն տեսնում։ Դատաբժշկական փորձաքննությունն էլ դա չի հաստատել։ Այդպիսով պետք է սպասել հայտարարության հետքերով հարուցված ծառայողական քննության ավարտին։
«Խոշտանգման մասին հաղորդում տված քաղաքացին այլ դեպքով է անցնում, որը փոխկապակցված է այլ գործի՝ ավազակային հարձակման հետ։ Եվ դա կարող է փաստաբանական մարտավարություն լինել։ Սրանք հարցեր են, որոնց պատասխանը կտա քննությունը։ Իհարկե, մեզ համար անընդունելի են բռնությունն ու խոշտանգումը, և գործընթացը գնում է դրանց նվազեցման, բայց ամեն ինչ պետք է հավասարակշռված լինի, որ ոստիկանության ծառայողն էլ կեղծ մեղադրանքի թիրախում չհայտնվի»,- ասաց փոխնախարարը։
Արթուր Սաքունցն էլ գտնում է, որ նման դեպքերում պետք է հրապարակվեն քաղաքացիներին ոստիկանության բաժին տանելու ժամանակ տեսախցիկների արձանագրած տվյալներըութերը, թե երբ է մտել և դուրս եկել, ինչ վիճակում է մտել կամ դուրս եկել, որ հանրության համար հասկանալի դառնան իրողությունները։ «Այդպիսով մենք ակնկալում ենք նաև օբյեկտիվ տեղեկատվություն»։
Բանավեճն անցկացվել է «Արդարացի դատաիրավական բարեփոխումներ» ծրագրի շրջանակում, որն իրականացվում է Ժողովրդավարության զարգացման հիմնադրամի առաջնորդությամբ ձևավորված կոնսորցիումի կողմից, որի անդամներն են Հանրային լրագրության ակումբը, Հելսինկյան քաղաքացիական ասամբլեայի Վանաձորի գրասենյակը և «Իրավունքների պաշտպանություն առանց սահմանների» ՀԿ-ն։
