Դասական համերգ՝Հյուսիսային պողոտայում
Երեկ երեկոյան Հայաստանի պետական երիտասարդական նվագախումբը Հյուսիսային պողոտայում բացօթյա համերգ էր կազմակերպել:« Նպատակն է ինտեգրել մարդկանց, հասկացնել,որ դասական երաժշտությունը նույնպես հաճելի է և կարող է լինել մասսայական»,- մինչ համերգի սկսվելը հայտարարեց երիտասարդական նվագախմբի գեղարվեստական ղեկավար և դիրիժոր Սերգեյ Սմբատյանը:
60-ից ավելի երաժիշտ ունեցող երիտասարդական նվագախմբից համերգին մասնակցում էր, գեղարվեստական ղեկավարի բառերով, նվագախմբի շարժիչ ուժը` Աննա Անդրեասովան (առաջին ջութակ), Ստեփան Խալաթյանը (երկրորդ ջութակ), Ռոզա Հայրապետյանը (ալտ), Գառնիկ Ենգիբարյանը (թավջութակ) և Վահագն Մարգարյանը (դաշնակահար): Համերգի ընթացքում հնչեցին Պիացոլլայի, Բրեգովիչի, Շտրաուսի ստեղծագործությունները։ «Ուրախալի է, որ այսքան մարդ եկել է դասական երաժշտություն լսելու: Այս փաստը ոգևորիչ է»,- ասաց ջութակահարուհի Աննա Անդրեասովան:
Նվագախումբը վաղը կմեկնի Օդեսա՝ մասնակցելու երաժշտական փառատոնի ` մինչ այդ խոստանալով,որ նմանօրինակ բացօթյա համերգները շարունակական կլինեն։
