Ազգային Ժողովի հերթական նիստ․ ՈՒՂԻՂ (տեսանյութ)
Աջակցիր «Ա1+»-ինԽորհրդարանը մարտի 5-ին շարունակել է հերթական նիստերի աշխատանքը:
ԱԺ նախագահ Ալեն Սիմոնյանի առաջարկով պատգամավորները շնորհավորել են ազգային հերոս Վազգեն Սարգսյանի ծննդյան օրը:
Նիստում օրենսդիրները շարունակել են ելույթ ունենալ «ՀՀ հակակոռուպցիոն կոմիտեի 2025 թվականի գործունեության մասին» հաղորդման վերաբերյալ:
Պատգամավորները խոսել են նախընտրական շրջանում ընթացող գործընթացների մասին: Անդրադարձ է կատարվել նախկին իշխանությունների կառավարման տարիներին տեղի ունեցած կոռուպցիոն երեւույթների բացահայտմանը: Իշխող ուժը ներկայացնող պատգամավորները հավաստիացրել են, որ իշխանությունը պայքար է մղում համակարգային կոռուպցիայի դեմ:
Ընդդիմադիր «Հայաստան» խմբակցության պատգամավորներն էլ իրենց հերթին մեղադրել են իշխող ուժին կոռուպցիոն դրսեւորումների մեջ:
«Հայաստան» խմբակցության անունից ելույթ է ունեցել խմբակցության քարտուղար Արծվիկ Մինասյանը, իսկ «Քաղաքացիական պայմանագիր» խմբակցության տեսակետը ներկայացրել է խմբակցության ղեկավար Հայկ Կոնջորյանը: Նրանք անդրադարձել են ելույթներում իրենց քաղաքական ուժերի նկատմամբ հնչած մեղադրանքներին, ներկայացրել հակափաստարկներ:
Եզրափակիչ ելույթում ՀՀ հակակոռուպցիոն կոմիտեի նախագահ Արթուր Նահապետյանը շնորհակալություն է հայտնել հակակոռուպցիոն պայքարում խնդիրների վերհանմանն ուղղված ու հանրային մտահոգություններ արտահայտող ելույթների համար: «Ձեր առաջարկներն ու մտահոգությունները կարեւոր ներդրում են հակակոռուպցիոն պայքարում մեր աշխատանքի արդյունավետության բարձրացման համար»,- ընդգծել է զեկուցողը:
Սպառելով օրակարգը՝ խորհրդարանն ավարտել է հերթական նիստերի աշխատանքը:
