Փաշինյանը չի ասել․ Վարչապետի աշխատակազմը հերքում է «Կոմերսանտ»-ի հրապարակումը
Աջակցիր «Ա1+»-ին«Հարցմամբ ներկայացված արտահայտություններն ու ձևակերպումները չեն պատկանում ՀՀ վարչապետին»,- «Ա1+»-ի հարցմանն ի պատասխան հայտնում են Վարչապետի աշխատակազմի Տեղեկատվության եւ հասարակայնության հետ կապերի վարչությունից։
«Ա1+»-ը վարչապետի աշխատակազմից փորձել էր ճշտել, թե արդյոք ռուսական «Կոմերսանտ» լրատվամիջոցի` վարչապետ Նիկոլ Փաշինյանին վերագրված արտահայտությունները, համապատասխանում են իրականությանը։
Ըստ ռուսական լրատվամիջոցի՝ Նիկոլ Փաշինյանը Երևանում անցկացված՝ Եվրոպական քաղաքական համայնքի գագաթնաժողովի ժամանակ արել է այսպիսի հայտարարություն․ «Այսօր Երևանում հանդիպում են բարեկամները․ այն երկրների առաջնորդները, որոնք ընտրել են ժողովրդավարական ուղին և պատրաստ են ապրել խաղաղության մեջ։ Միայն նախկին ԽՍՀՄ-ի մեկ երկիր համաձայն չէ դրա հետ։
Շատերն արդեն լքել են ԱՊՀ-ն հենց այդ երկրի պատճառով։ Ճիշտ կլինի ստեղծել Ռուսաստանից իրականում անկախ պետությունների նոր համագործակցություն՝ ներառելով նախկին ԽՍՀՄ-ի 14 երկրները»։
Հիշեցնենք, որ մայիսի 4-ին Երեւանում կայացել է Եվրոպական քաղաքական համայնքի 8-րդ գագաթնաժողովը: Երևանում էին Ֆրանսիայի նախագահը, Մեծ Բրիտանիայի, Իտալիայի, Իսպանիայի, Բելգիայի, Չեխիայի, Նորվեգիայի, Լեհաստանի վարչապետերը, Եվրոպական միության ղեկավարները, ՆԱՏՕ-ի գլխավոր քարտուղարը: Առաջին անգամ այս ձևաչափով հավաքին որպես հյուր մասնակցում էր Կանադայի վարչապետը:
