Ս.Սարգսի տոնը՝ փետրվարի 4-ին
Այս տարի Հայ առաքելական եկեղեցին Սուրբ Սարգիս Զորավարի տոնը կնշվի փետրվարի 4-ին:
Այդ օրը Ս.Սարգիս Զորավարի անունը կրող եկեղեցիներում կմատուցվի Ս. Պատարագ, որից հետո կկատարվի երիտասարդների օրհնության կարգ:
«Այս տարի մենք նախատեսել ենք իրականացնել տարբեր միջոցառումներ զորամասերում: Այդ օրը «Շոկոլադ» թատերախումբը կայցելի հիվանդանոցներ, իր երգով ու պարով կուրախացնի հիվանդ երեխաներին: Իսկ փետրվարի 3-ին Նոր Նորքի Ս.Սարգիս եկեղեցին քաղաքապետարանի կրթության վարչության և Հայորդաց տների հետ համատեղ Նոր Նորքի թաղապետարանի բակում կազմակերպելու է մեծ համերգային միջոցառում, որից հետո խաչով քայլերթ կլինի դեպի Ս.Սարգիս եկեղեցի»,-«Ա1+»-ին հայտնեց Արարատյան Հայրապետական թեմի մամլո դիվանի պատասխանատու Էլիզա Մանուկյանը:
Ս.Սարգսի տոնին նախորդող գիշերը երիտասարդներն աղի բլիթ են ուտում՝ իրենց սիրեցյալին երազում տեսնելու համար։
Այդ օրը փոխինդով կամ ալյուրով մատուցարանը դնում են տան տանիքին կամ պատշգամբին և սպասում Ս. Սարգիս զորավարի ձիու պայտի հետքին: Ըստ ավանդույթի` Ս. Սարգիսը պետք է հրեշտակների ուղեկցությամբ անցնի և ում մատուցարանի մեջ դրված ալյուրի կամ փոխինդի մեջ թողնի իր սպիտակ ձիու պայտի հետքը, այդ տարի կիրականանա նրա երազանքը:
