Հրդեհ է բռնկվել մանկապարտեզում
Այսօր՝ առավոտյան ժամը 10-ի սահմաններում, հրդեհ է բռնկվել Ալավերդու քաղաքապետարանի ենթակայության տակ գտնվող թիվ 6 մանկապարտեզում:
Հրդեհը բռնկվել է Սարահարթ թաղամասի 2-րդ զանգվածում գտնվող մանկապարտեզի չգործող մասնաշենքի տանիքից:
Կրակը նկատելուն պես մանկապարտեզի աշխատողները անմիջապես զանգահարել են Ալավերդու հրշեջ ծառայություն: Ծառայության աշխատակիցները, սակայն, դեպքի վայր են եկել 40 րոպե հետո միայն: Մանկապարտեզի աշխատակիցները հասցրել են երեխաներին դուրս բերել շենքից: Հրդեհը հասել է նաեւ գործող մասնաշենքի տանիք:
Հրդեհաշիջման աշխատանքներ իրականացնելու համար Ալավերդու հրշեջներին իրենց մեքենայով օգնության են եկել Օձունի հրշեջները: Մեկ ժամ անց է միայն նրանց հաջողվել մարել հրդեհը: Ավելի ուշ դեպքի վայր եկավ նաեւ Լոռու մարզային փրկարարական վարչության պետ գնդապետ Հրաչ Անտոնյանը:
«Անկյուն+3» ՀԸ
