Ութ բուհ հավատարմագրվելու են
Հանրապետության ութ բուհեր պատրաստվում են հավատարմագրման։
Մարտի 22-ին և 23-ին «Մասնագիտական կրթության որակի ապահովման ազգային կենտրոն» հիմնադրամն ու Նիդերլանդների և Ֆլանդրիայի հավատարմագրման կազմակերպությունը (NVAO` Nederlands-Vlaamse Accreditatieorganisatie) կիրականացնեն սեմինարների երկրորդ շարքը` կրթության ներքին որակի ապահովման վերաբերյալ:
Սեմինարները նպատակ ունեն նախապատրաստել 8 հավատարմագրվող բուհերին ` գործընթացն իրականացնելու համար: Հիշեցնենք, որ այդ բուհերն են Երևանի պետական համալսարանը, Երևանի Մ. Հերացու անվան պետական բժշկական համալսարանը, Հայաստանի պետական ճարտարագիտական համալսարանը, Երևանի Վ. Բրյուսովի անվան պետական լեզվաբանական համալսարանը, Հայաստանի պետական ագրարային համալսարանը, Կոմիտասի անվան Երևանի պետական կոնսերվատորիան, Երևանի Հյուսիսային համալսարանը և Երևանի «Գլաձոր» համալսարանը:
Սեմինարներն անցկացնելու են Նիդերլանդների և Ֆլանդրիայի հավատարմագրման կազմակերպության ներկայացուցիչները: Վերջիններս շուրջ 2 տարի աշխատելու են ՀՀ-ում, աջակցելու են Մասնագիտական կրթության որակի ապահովման ազգային կենտրոնին միջազգային ճանաչման եւ հայաստանյան բուհերի հավատարմագրման գործընթացն իրականացնելու համար:
