Բնապահպաններին նյութական աջակցություն է պետք
Երիտասարդ բնապահպան Միքայել Նազարյանը կարծում է, որ կաթողիկոսի խոսքին որևէ լուրջ գործողություններ դժվար թե հետևեն. «Երբ գիտենք, որ մեր հոգևոր առաջնորդը մեզ հետ է, դրանից մեր ոգին ավելի է բարձրանում: Սրանով պարզապես ավելի կշատանա մեր համակիրների քանակը»:
Մաշտոցի պուրակի ակտիվիստներին ոգևորում է այն, որ Գարեգին Բ Ամենայն հայոց կաթողիկոսը ողջունել է բնապահպանների նախանձախնդրությունը բնապահպանական խնդիրների վերաբերյալ:
Նրանց կարծիքով անիմաստ են դառնում ողջույնները, եթե գործողություն չկա դրանց մեջ: Եթե անգամ բնապահպանների այս նախաձեռնությունը ողջունել է երկիր հոգևոր առաջնորդը, ակտիվիստները հստակ քայլեր և արդյունքներ են ցանկանում տեսնել:
Քանի որ նրանք պայքարում են ինչպես Մաշտոցի պուրակում կրպակների տեղադրման դեմ, այնպես էլ Թեղուտի պահպանման և Հայաստանում առկա էկոլոգիական այլ խնդրիների լուծման համար, ուստի նրանց այս պահին ավելի շատ նյութական աջակցություն է պետք:
«Անընդհատ ակնկալիքներ ունենք, որ ինչ-որ օգնություն մեզ կցուցաբերվի: Քանի որ մենք պայքարելու ենք նաև Թեղուտում, վրանների և նմանատիպ այլ միջոցների կարիք ունենք:
Այստեղ(Մաշտոցի պուրակ) քնապարկերում մի կերպ տեղավորվում ենք, որովհետև մոտ քսան հոգի են մնում, իսկ Թեղուտի պայքարն ավելի լայնամասշտաբ գործողություն է լինելու, որն ավելի մեծ օժանդակության կարիք ունի»,- ասում է Միքայելը:
Կաթողիկոսը բնապահպանների նախաձեռնություններին անդրադարձել է այն բանից հետո, երբ օրեր առաջ Լոս Անջելեսում գործող «Թեղուտի պաշտպանության» զորակցող խումբը բաց նամակ է հղել վերջինիս, որտեղ կոչ է արված կաթողիկոսին սատարել բնության պահպանությանն ուղղված պայքարին:
Գարեգին Բ Ամենայն Հայոց կաթողիկոսի՝ երիտասարդ բնապահպաններին ուղղված նամակում մասնավորապես նշված էր.
«Բնապահպանական խնդիրներն իրենց լուծումները պիտի գտնեն պետական պատկան մարմինների կողմից օրենսդրության շրջանակներում` առաջնորդված երկրի եւ հասարակության շահերով»:
