Կխախտվի թանգարանային ավանդական լռությունը
Էրեբունի պատմահնագիտական արգելոց-թանգարանը ևս կմիանա Թանգարանների եվրոպական գիշերվան՝ ներկայանալով անսպասելի երաժշտական հանդերձանքով։
Այս տարի թանգարանը, խախտելով իր ավանդական լռությունը, այցելուներին առաջարկում է ցուցասրահներով անցնել երաժշտության ուղեկցությամբ։
«Թանգարանային գիշերը մեր ամենահոգսաշատ օրն է»,- ասում է Էրեբունի թանգարանի հասարակայնության հետ կապերի և հանրահռչակման բաժնի վարիչ Հասմիկ Ազիզյանը։ Թանգարանային բաց դռների օրը ավելի շատ հետաքրքրասեր այցելուներ է դեպի իրեն գրավում։
Այս տարի Էրեբունի թանգարանը մատչելի կլինի նաև տեղաշարժման սահմանափակ կարողություններ ունեցող անձանց համար, ովքեր ցուցասրահ կարող են մուտք գործել ուղիղ մեկ ամիս առաջ շահագործման հանձնված թեքահարթակով։
Ի դեպ, Հասմիկ Ազիզյանի հավաստմամբ, արգելոցի տարածքում հայ-ֆրանսիական համատեղ արշավախմբի ուժերով հունիս ամսին կմեկնարկի պեղումների մի նոր շրջան. հայտն արդեն ներկայացված է։
