Հուշատախտակը կբացվի վաղը
Վաղը Երեւանի Ժուռնալիստների միության շենքի վրա, Պուշկինի 3 ա, կբացվի հայտնի մանկավարժ, աշխարհագրական գիտությունների դոկտոր, պրոֆեսոր, 1999թ.-ից ՌԴ կրթության ակադեմիայի ակադեմիկոս Լեմվել Վալեսյանի հուշատախտակը:
Նա երկար տարիներ դասախոսել է Երևանի պետական համալսարանում: Եղել է ՀՍՍՀ գիտությունների ակադեմիայի տնտեսագիտության ինստիտուտի բաժնի վարիչ: 1971-77թթ. ղեկավարել է Խաչատուր Աբովյանի անվան հայկական պետական մանկավարժական ինստիտուտի տնտեսական աշխարհագրության եւ աշխարհագրության դասավանդման մեթոդիկայի ամբիոնը, իսկ 1979թ. հուլիսի 10-ին նշանակվել է նույն իստիտուտի ռեկտոր եւ այդ պաշտոնը վարել է մինչև 1987թվականը:
Լեմվել Վալեսյանը 2010 թվականին, 81 տարեկան հասակում կնքեց իր մահկանացուն: Կյանքի վերջին երկու տարում նա համատեղության կարգով դասավանդում էր նաեւ Մանկավարժական համալսարանում:
Այս մասին հայտնում է ՀՊՄՀ Լրատվության եւ հանրության հետ կապերի վարչությունը։
