“Հարսնաքարի” գործով ձերբակալվածն ազատ է արձակվել
"Հարսնաքար" ռեստորանում զինվորական բժիշկների ծեծի գործով ձերբակալված, "Հարսանքարի" մենեջեր Դավիթ Հայիրյանն այսօր ազատ է արձակվել: Այս մասին տեղեկացանք ոստիկանության հասարակայնության հետ կապերի եւ լրատվության վարչությունից:
"Դավիթ Հայրիյանը տուժողներին ներկայացվել է ճանաչման, տուժողները չեն ճանաչել եւ քրդատ օրենսգրքի 132 հոդվածի 1-ին մասի 1-ին կետով`այն է`չի հաստատվել անձի կողմից քրեական արարք կատարելու մասին կասկածը, նա ազատ է արձակվել",- "Ա1+"-ի հետ զրույցում ասաց վարչության աշխատակից Արմեն Մալխասյանը:
"Հարսնաքարի" գործով կալանավորված են միջադեպի 6 մասնակիցներ` Դավիթ Ադամյանը, Դավիթ Մարգարյանը, Արթուր Բաբլոյանը, Արման Բաղդասարյանը, Արման Խաչատրյանը եւ Նորայր Հայրապետյանը: Որոշ տեղեկություններով` կալանավորվածների մեջ կան Ռուբեն Հայրապետյանի թիկնազորի անդամներ, որոնց շրջապատում ճանաչում են որպես Հայրապետյանի թիկնապահներ: "Չեմ կարող ասել, բոլորը տեղի` "Հարսնաքարի" աշխատողներ են` անվտանգության աշխատող, մատուցող",- մեր հարցին ի պատասխան ասաց Արմեն Մալխասյանը:
Նշենք, որ "Հարսնաքարում" դաժան ծեծի ենթարկված զինվորական բժիշկ Վահե Ավետյանի վիճակը շարունակում է մնալ ծայրահեղ ծանր:
