Սարգսյանի օլիմպիական ուղերձը
Հայաստանի նախագահ Սերժ Սարգսյանը 2012 թ օլիմպիական խաղերի բացման արարողությունից մեկ օր առաջ իր ուղերձն է հղել հայ օլիմպիականներին:
«Սիրելի՛ մարզիկներ եւ մարզիչներ, Հայաստանը հերթական անգամ իր պատվիրակությամբ ներկայանում է համաշխարհային գլխավոր մարզահանդեսին` ամառային օլիմպիական խաղերին:
Համոզված եմ, որ պատվով կներկայացնեք մեր երկիրը, ազնիվ մրցակցություն կծավալեք մրցասպարեզներում, լիովին կդրսեւորեք ձեր վարպետությունը, հմտությունները ու պատվով կպաշտպանեք Հայաստանի մարզական դրոշի պատիվը:
Անշուշտ, գիտակցում եք, որ ձեր մրցելույթներին ուշադրությամբ հետևելու են Հայաստանի և սփյուռքի մեր հայրենակիցները: Հավատում եմ, որ կարդարացնեք սպասելիքները, նոր նվաճումներով կհարստացնեք օլիմպիական խաղերի հայաստանցի չեմպիոնների եւ մրցանակակիրների շարքը եւ ձեր արժանի տեղը կգտնեք հայրենական սպորտի պատմագրքում:
Անձամբ եմ տեղում հետեւելու «Լոնդոն-2012»-ի ընթացքին, լինելու եմ հայ մարզիկների ջերմեռանդ երկրպագուներից մեկը: Ավելին, ցանկանում եմ լինել ձեր հաղթանակների ականատեսը, որպեսզի միասին ապրենք հաջողությունների բերկրանքը:
Զինվենք համբերությամբ, հաղթանակների ակնկալիքով:
Ձեզ բարի ճանապարհ եւ հաղթական վերադարձ»:
Հավելենք, որ աշխարհի ոչ մի երկրի նախագահ առայժմ չի հայտարարել, որ լոնդոնյան խաղերը տեղում հետեւելու մասին:
