«Հարսնաքարի» գործը ձգձգվում է
Փաստաբան Վաղարշակ Գևորգյանն այսօրվանից «Հարսանքարի» գործով ամբաստանյալ Արման Բաղդասարյանի նոր պաշտպանն է:
Նման որոշում կայացրեց Երևանի Ավան և Նոր Նորք վարչական շրջանների դատարանը՝ դատավոր Դավիթ Հարությունյանի նախագահությամբ։
Նոր պաշտպանը 2 շաբաթ ժամկետ խնդրեց երեք հատոր կազմող գործի նյութերին ծանոթանալու համար: Սակայն դատարանը ողջամիտ համարեց մեկշաբաթյա ժամկետը և փաստաբանին ժամանակ տրամադրեց մինչև հաջորդ չորեքշաբթի, հոկտեմբերի 10-ը:
Դատարանը քննարկել է նաև մեղադրող Արթուր Դավթյանի առաջարկությունը շաբաթական երկու դատական նիստեր անցկացնելու մասին: Դատարանը որոշեց հոկտեմբերի 22-ից սկսած անցկացնել շաբաթական երկու նիստ՝ ներկայիս մեկի փոխարեն։
Այս անգամ էլ դատական նիստին չէին ներկայացել տուժողները, ծեծի հետեւանքով մահացած Վահե Ավետյանի իրավահաջորդ Գառնիկ Ավետյանն ու նրա ներկայացուցիչ Վահե Գրիգորյանը:
