Սեմինար-վարժանք Ճարտարագիտականում
Ապրիլի 30-ին Հայաստանի պետական ճարտարագիտական համալսարանում (պոլիտեխնիկ) երիտասարդ ճարտարագետների նորարարության և ձեռներեցության դպրոցի շրջանակներում երիտասարդ մասնագետների հետ «Անձի վերլուծության և զարգացման հմտություններ» թեմայով սեմինար-վարժանք անցկացրեց Ռուսաստանի Դաշնության Սանկտ Պետերբուրգի պետական համալսարանի պրոֆեսոր, կառավարման հոգեբանության ոլորտի բարձրակարգ մասնագետ Գալինա Բիրյուկովան:
Երիտասարդ ճարտարագետների նորարարության և ձեռներեցության դպրոցը կազմակերպել են Հայաստանի երիտասարդական հիմնադրամը և Հայաստանի պետական ճարտարագիտական համալսարանը։ Այն անցկացվում է ՀՀ նախագահի հովանու ներքո իրականացվող «Աջակցություն երիտասարդ գիտնականներին» ծրագրի շրջանակներում։
ՀՊՃՀ երիտասարդ ճարտարագետների նորարարության և ձեռներեցության դպրոցի կազկոմիտեի նախագահ Հրայր Աբրահամյանը նշում է, որ դպրոցի նպատակն է ուսումնառուներին տրամադրել գիտելիքներ նորարարական ձեռներեցության մասին, նպաստել անհրաժեշտ նորարարական մտածելակերպի ձևավորմանը և զինել նրանց համապատասխան հմտություններով և ունակություններով:
Դպրոցում անցկացվում են զեկույց-դասախոսություններ, թրեյնինգներ, գործնական աշխատանքներ, սեմինարային ներկայացումներ, հրավիրված բանախոսների հետ քննարկումներ և բանավեճեր:
Այս մասին հայտնում է Հայաստանի երիտասարդական հիմնադրամի հասարակայնության հետ կապերի ծառայությունը։
