Դիլիջանի միջազգային դպրոցը՝ սողանքի գոտում
Դիլիջանը որքան գեղեցիկ է, նույնքան էլ՝ վտանգավոր: Սակայն շահագործողները եւ շենքեր կառուցողները մոռացել են դրա մասին: Այսօր լրագրողների հետ հանդիպման ժամանակ նշեց «Ինժեներ-երկրաբան» ընկերության նախագահ Ռուբեն Յադոյանը: Նրան հատկապես ցավ է պատճառում այն հանգամանքը, որ հակասողանքային միջոցառումներ չեն իրականացվում:
Պարոն Յադոյանը գիտի նաեւ, թե ինչու է մասնավոր ներդրողը աչք փակում այդ ամենի վրա: Վերջինիս խոսքերով՝ իրենք գումար ունեն եւ իրենց ամեն ինչ կարելի է:
Անդրադառնալով Դիլիջանի միջազգային դպրոցի կառուցմանը՝ վերջինս նշեց, որ այդ հատվածը ամբողջությամբ բավականին ակտիվ սողանք է եւ նախկինում Դիլիջանի տուրբազայի շենքերն էին, որոնք ճաք էին տվել, քանդվել էին եւ հիմա նոր կառույց են սկսել: Նա հիշեցնում է, որ սողանքային գոտում կառուցվող բոլոր շենքերը քանդվելու են եւ միլիարդներ են ներդրվում սողքի վրա:
Պարոն Յադոյանի խոսքերով՝ Հայաստանում 3000-ից 3500 խոշոր եւ մանր սողանքներ կան, որոնցից մոտ 200-ը լուրջ վտանգ են ներկայացնում: Ամենավտանգավորը Մեղրիում Ղափանն է՝ սողանքների առումով, իսկ հաջորդ խոշորը՝ Գորիսի Քարահունջի տակի սողանքը: Միջին սողանքային գոտին ամրացնելու համար 100 միլիոն ԱՄՆ դոլար է անհրաժեշտ:
