Շախմատի ևս մեկ դպրոց բացվեց
Արաբկիր վարչական շրջան կատարած աշխատանքային շրջայցի շրջանակում Երևանի քաղաքապետ Տարոն Մարգարյանն այցելել է Արաբկիրի նորաստեղծ շախմատի դպրոց և մասնակցել բացման հանդիսավոր արարողությանը: Մարզադպրոցի բացման պատիվը վերապահվել է Երևանի քաղաքապետ, Երևանի շախմատի ֆեդերացիայի նախագահ Տարոն Մարգարյանին և Հայաստանի շախմատի ֆեդերացիայի փոխնախագահ Սմբատ Լպուտյանին:
Քաղաքապետը շրջել է դպրոցի շենքում, ծանոթացել ստեղծված պայմաններին: Ինչպես այս, այնպես էլ մայրաքաղաքում գործող շախմատի դպրոցներն ամբողջությամբ կահավորված են համապատասխան գույքով ու անհրաժեշտ այլ պարագաներով, ուսումնական գործընթացի համար ստեղծված են անհրաժեշտ բոլոր պայմանները:
Շնորհակալություն հայտնելով շախմատի զարգացման նկատմամբ քաղաքապետի ցուցաբերած ուշադրության համար ու առանձնակի կարևորելով հատկապես շախմատի դպրոցների անվճար գործելու հանգամանքը՝ պատասխանատուները նկատել են, որ շախմատի դպրոցների ստեղծումով մայրաքաղաքում զգալիորեն ավելացել է շախմատասեր մանուկների և պատանիների թիվը:
Շահագործման է հանձնվել Արաբկիրի Սունդուկյան 90 հասցեում կառուցված նոր այգին
Արաբկիր վարչական շրջան կատարած աշխատանքային շրջայցի շրջանակում Երևանի քաղաքապետ Տարոն Մարգարյանը վարչական շրջանի ղեկավարի ուղեկցությամբ ծանոթացել է նաև Սունդուկյան 90 հասցեում կառուցված նոր այգու պայմաններին: Ժամանակին տարբեր շահարկումների առարկա դարձած բակային այս տարածքը քաղաքապետարանի տարեկան ծրագրի շրջանակում ամբողջովին բարեկարգվել ու դարձել է հարմարավետ կահավորված հանգստի գոտի: Մաքրված ու բարեկարգված 1300 քմ մակերեսով ներկայիս այգու տարածքը կահավորվել է նստարաններով, կանաչ տարածքների խնամքն ապահովելու նպատակով անցկացվել է 195 գծմ ոռոգման նոր ցանց, տեղադրվել է 211 գծմ եզրաքար, տարածքն ապահովվել է նաև գիշերային լուսավորությամբ։
Երևանի քաղաքապետարանի տեղեկատվության
և հասարակայնության հետ կապերի վարչություն
