Ակցիայի մասնակիցների մի մասը Բաղրամյան 26 չհասավ. փակել էին ճանապարհները (տեսանյութ)
Կոտայքի մարզի Բյուրեղավան քաղաքում տարաների արտադրությամբ զբաղվող «Glass World Company» ընկերությունից տուժած աշխատակիցների մեծ մասն այսօր չկարողացավ Աբովյանից Երեւան հասնել: «Զանգեցինք իրենց, ասացին ճանապարհը փակել են, չեն թողել գան, տարել են մարզպետարան, Գուլոյանն (մարզպետ Կարապետ Գուլոյան-խմբ.) է եկել, հետները խոսել»,- ասում է Մուշեղ Ջամալյանը: Իսկ Գաբրիել Ջամալյանն էլ ավելացնում է. «Ասել է, եթե իջնեք Բաղրամյան 26, մենք էլ չենք զբաղվի ձեր աշխատավարձերի հարցով»: Կոտայքի մարզպետը խոստացել է մեկ ամիս հետո վճարել աշխատավարձերը, սակայն դա նրանց այդքան էլ չի ոգեւորել: « Ինքն ամսի 15-ից 30-ը խոստացել էր, որ պետք է վճարումները անի, բայց խնդրեց, որ դիմենք դատարան: Հիմա նորից ասել է մի ամիս սպասեք, տեսնենք, թե խնդիրն ինչումն է, կարծում եմ, որ նորից ժամանակի վրա են աշխատում»,- ասում է Արմեն Խաչատրյանը: Գործարանի աշխատակիցները որոշել էին նախագահական նստավայրի դիմաց կրկին բարձրաձայնել իրենց չստացած աշխատավարձերի մասին: Գործարանը ունեցել է 350 աշխատակից, որոնց, ըստ ակցիայի մասնակիցների, 150-ից մինչեւ 400 հազար դրամ է պարտք: «Բանկին պարտք ունեմ, փող եմ վերցրել, որ աշխատավարձը չստանալու ժամանակ կարողանամ ապրել: Մենակ ես չեմ, իմ նման շատերն են»,- ասում է Պապիկ Վիրաբյանը: Հիշեցնենք, որ գործարանը նախորդ տարվա օգոստոս ամսից դադարեցրել է իր արտադրությունը: Իսկ աշխատակիցներին ոչինչ չի մնում, քան սպասել աշխատավարձի:
