Գեւորգ Սաֆարյանը ոստիկանին չի հարվածել. վկա (տեսանյութ)
Գեւորգ Սաֆարյանը չի հարվածել որեւէ ոստիկանի: Ամանորի գիշերը տոնածառ տեղադրելու փորձից հետո ամբաստանյալի աթոռին հայտնված Գեւորգ Սաֆարյանի գործով նիստին վստահ հայտարարեց վկա Սուսաննա Սիմոնյանը: «Հարվածելու փորձ չի արել: Գեւորգն այդ օրը եղել է միայն բողոքողի դերում: Նա ուզում էր այդ իրավիճակից դուրս հանել բոլորին»,- այսօր դատարանում հայտարարեց վկան: Արդեն 11 ամիս անազատության մեջ գտնվող Հիմնադիր խորհրդարանի անդամ Գեւորգ Սաֆարյանը մեղադրվում է ոստիկան Գեղամ Խաչատրյանին հարվածելու մեջ: Մինչդեռ վկան հակառակն է պնդում : «Ակնհայտ սադրանք էր տեղի ունենում բարբարոսների կողմից: Աջ ու ձախ հարվածում էին եւ սարսափելի հայհոյանքներ էին հնչում: Միտումնավոր հարձակում էին գործում, սադրանք էին անում Գեւորգի նկատմամբ» Վկան նաեւ տեղեկացրեց, որ դեպքի ողջ ընթացքում Գեւորգը եղել է իր ուշադրության կենտրոնում: Նա նույնիսկ Երեւանի փոխոստիկանապետ Վալերի Օսիպյանին բողոքել է, որ իրենց հարվածող ոստիկանների վրայից ալկոհոլի հոտ է գալիս: Սուսաննա Սիմոնյանը նշեց, որ տվյալ դեպքում ոստիկանների խմբին կարելի է որակել, որպես բարբարոսների խումբ: «Ես ընդհատում եմ ձեզ վիրավորանք հասցնելու համար»,- նշեց դատավոր Մնացական Մարտիրոսյանը: Այսօրվա դատական նիստում հարցաքննված Վահագն Ղումաշյանն էլ ավելացրեց, որ Ամանորի գիշերը իր մոտ այնպիսի տպավորություն էր, թե ոստիկան Գեղամ Խաչատրյանին առիթ էր պետք Գեւորգ Սաֆարյանին հարվածելու համար: Ազատության մեջ գտնվող վկաների հարցաքննությունն ավարտելուց հետո, դատարանը կլսի նաեւ, «Սասնա ծռերի» գործով կալանավորված անձանց: Նիստը կշարունակվի նոյեմբերի 21-ին:
