Հայտնի մարդիկ՝ կոմունիստների ցուցակում (տեսանյութ)
Կոմունիստական կուսակցության վարկանիշային ցուցակով Կոտայքի մարզում առաջադրված Նաիրա Մարտիրոսյանը համոզված է՝ ընտրողները ձայնը տալուն են իրեն, քանի որ 16 տարի աշխատել է Հրազդան քաղաքում: «Հրազդան ցեմենտ» գործարանի նախկին տնօրենը կարծում է, որ ԱԺ-ում պետք է ներկայացված լինեն բոլոր քաղաքական ուժերը, ինչքան շատ ուժեր լինեն, այնքան լավ: «Այդ ուժերը, ներկայացուցիչները շարժումների, կուսակցությունների, միությունների, դաշինքների, ինչո՞ւ չեն գալիս ԱԺ, եթե շատ մտահոգված են երկրի համար, ինչո՞ւ չեն գալիս նիստերին մասնակցում: ԱԺ-ում նույն աշխատանքն է, ես չեմ պատկերացնում մի օր, որ չգնամ աշխատանքի: Դա այդ մարդկանց աշխատանքն է: Եթե չեն գալիս ԱԺ, ապա հարց է առաջանում, ինչո՞վ են զբաղված եւ ինչո՞ւ են ընտրվել պատգամավոր: Նրանց հետաքրքիր չեն այն հարցերը, որ քննարկվում են ԱԺ-ում, այդ մարդիկ մտահոգված չեն մեր երկրի, մեր ժողովրդի խնդիրներով»,- այս մասին այսօր լրագրողների հետ հանդիպման ժամանակ ասաց Նաիրա Մարտիրոսյանը: Նա կարծում է, որ Կոմկուսը անպայման պետք է հաղթի եւ իր դիրքը գրավի մեր երկրի զարգացման մեջ: Ընտրություններին Կոմունիստական կուսակցության ցուցակով մասնակցելու է նաեւ Ավիատորների միության նախագահ Դմիտրի Աթբաշյանը: Նա չգիտի նույնիսկ, թե ցուցակի ո՞ր համարն է զբաղեցնում: Անկեղծանում է՝ առաջարկել են մասնակցել, համաձայնել է: Դմիտրի Աթբաշյանը մտածում է հզոր ավիացիա ստեղծելու մասին, ինչպես Կոմունիստական կուսակցության օրոք է, արդեն օդային օրենսգիրք է մշակվել, եւ ընտրվելու դեպքում այն իրականություն են դարձնելու: Բաց երկնքի քաղաքականությունն էլ, Դմիտրի Աթբաշյանի խոսքերով, պետք է վերացվի, այն վնաս է բերում:
