«Եթե չընտրվեք կգյուլլենք». տատիկները՝ Արթուր Բաղդասարյանին
Նախընտրական քարոզարշավի շրջանում ՀՎԿ ներկայացուցիչները այսօր հանդիպեցին Երևանի Մալաթիա-Սեբաստիա համայնքի բնակիչների հետ: Միջոցառման շրջանակներում Կուսակցության հիմնադիր նախագահ Արթուր Բաղդասարյանը բարձրաձայնեց մի շարք սոցիալական խնդիրներ, որոնք թեև տարիներ ի վեր մնում են օրակարգում: Ելույթում նա մասնավորապես շեշտեց՝ «Հայաստանում չկա մարդ, որ չխոսի փոփոխություններ անելու անհրաժեշտության մասին, և յոթ սարի ետևում չեն ընտրությունները, բայց եկեք այնպես անենք, որ ապրիլի 3-ին չասենք նորից՝ այս երկիրը երկիր չէ: Եկեք գիտակցենք մեր պատասխանատվությունը»։ Ըստ Բաղդասարյանի ՝ ներկայիս իշխանությունները համոզում են, որ հնարավոր չէ պետբյուջեի հաշվին լուծել պետության առջև ծառացած սոցիալական խնդիրները, սակայն ԱԺ-ում առաջադրած պետբյուջեն համալրելու հնարավորություն տվող բոլոր օրինագծերը մերժվում են, մասնավորապես ՀՎԿ-ի մշակած՝ «Շքեղության հարկի մասին օրենքը», սուպերմարկետների քանակը բնակչության թվաքանակով սահմանափակելու վերաբերյալ օրենքը, ինչը կխթանի ՓՄՁ-ների զարգացմանը, խաղատների հարկային բեռը ավելացնելու վերաբերյալ օրենքը: ՀՎԿ նախագահը նաև կարծում է, որ բյուջետային մուտքերը ավելացնելու համար պետք է արգելել օֆշորներում գրանցված կազմակերպություններին՝ օգտագործել Հայաստանի ընդերքի օգտագործումը, մեծացնել բնապահպանական վճարը և հարկերը: «Այսօր Հայաստանում 350 հազ. մարդ ստանում է 55 հազար դրամ: Հարց՝ 55 հազար դրամով մարդ կարո՞ղ է ապրել: 5 տարիների ընթացքում չի բարձրացել նաև ծերության թոշակները, երբ թոշակառուների թիվը հասնում է 500 հազարի: 200 հազար հաշմանդամ ստանում է 20 հազար դրամի նպաստ: Արագաչափերից մեկ տարում գանձվել է 24.6 մլրդ. դրամ, իսկ բյուջեով հաշմանդամների թոշակների համար նախատեսված է 2.5 մլրդ. դրամ: Կա՞ համեմատության եզր»,- նշեց Արթուր Բաղդասարյանը: «Սրանք հռետորական հարցադրումներ են, որոնք իրական լուծումներ են ենթադրում»,-hավելեց նա: ՀՎԿ նախագահի ելույթից հետո Մալաթիա-ՍԵբաստիա համայնքում բնակվող մի քանի տարեց կին մոտեցան նրան և վճռականորեն հայտարարեցին` «Եթե չընտրվեք , կգյուլլենք»:.
