Կոմունիստներն իշխանության կգան քաղաքակիրթ տարբերակով (տեսանյութ)
Մենք պարտավոր ենք վերադառնալ իշխանության, քանի որ այդ 70 տարիները գրված են ոսկեգույն տառերով: Այսօր լրագրողների հետ հանդիպման ժամանակ նշեց ՀԿԿ առաջին քարտուղար Տաճատ Սարգսյանը: Նրա խոսքերով՝ իշխանության գալու երկու տարբերակ կա՝ հեղափոխության եւ քաղաքակիրթ ճանապարհով: Մենք քաղաքակիրթ տարբերակով՝ընտրությունների միջոցով ենք ցանկանում մտնել ԱԺ: Նախընտրական ցուցակի առաջին համարը զբաղեցնող Տաճատ Սարգսյանի խոսքերով՝ նախորդ ընտրություններին ԱԺ- ում չեն հայտնվել, քանի որ կեղծվել են ձայները. «Եթե ԱԺ-ում չկա կոմունիստական գաղափարախոսություն եւ չկա սոցիալական խնդրիրների լուծում, ապա ԱԺ-ն երկու ոտքով կաղում է»: Նա անկեղծացավ՝ հաճախ հարց են տալիս, եթե փոքրաթիվ թվով անձինք հայտնվեցին, ինչպես են խնդիրներ լուծելու: Կլինեն ընկերներ, որոնք մեր ներկայացրած նախագծերին դրական կարձագանքեն եւ կքվեարկեն այդ նախագծի օգտին»: 114 ամյա կուսակցության ղեկավարը այսօր դժգոհեց, որ կուսակցությունը ծանր սոցիալական վիճակում է հայտնվել: Գրասենյակների տարածքների համար մեծ գումարներ են պահանջում: Սակայն դա չի խանգարել, որ 20,000 անդամ ունեցող կուսակցությունը վճարի նախընտրական գրավը: « Ռուսաստանը մեզ չի ֆինանսավորում, այնտեղից նույնիսկ տասը կոպեկ չի մտել Հայաստան»,- այսօր հայտարարեց Տաճատ Սարգսյանը: Նրա խոսքերով՝ կոմունիստների հաղթանակը կլինի ժողովրդի հաղթանակը եւ գործունեությունը կբխի ժողովրդի շահերից: ՀԿԿ քարտուղարը հույս հայտնեց, որ ապրիլի 3-ին իրեն կհրավիրեն ասուլիսի՝ խորհրդարանում հայտնվելու կապակցությամբ։
