«Վերաքննիչ դատարանում մեզ ծիծաղով են ընդունում» (տեսանյութ)
Ամանորի գիշերը Ազատության հրապարակում տոնածառ տեղադրելու փորձից հետո 2 տարվա ազատազրկման դատապարտված Գեւորգ Սաֆարյանը չի ստացել իր պաշտպանի Վերաքննիչ դատարան ներկայացրած, իսկ պաշտպանը՝ Գեւորգ Սաֆարյանի բողոքը: Գեւորգ Սաֆարյանը դատարանին խնդրեց իրեն տրամադրել պաշտպանի ներկայացրած բողոքի կրկնօրինակները: «Հարգելի դատարան, ես էլ չունեմ իմ պաշտպանյալի բողոքը, որովհետեւ նա բանտից է գրել եւ ուղարկել»,- դատարանում հայտարարեց պաշտպան Տիգրան Հայրապետյանը: Պաշտպանը իր հիմնավորումը ներկայացնելիս նկատեց, թե ինչպես է դատավոր Մհեր Արղամանյանը ժպտում ։ Սա դարձավ ինքնաբացարկի միջնորդություն անելու առիթ։ «Իմ ասածները դատավորը ծիծաղով է ընդունում 37 էջանոց հիմնավորումներ եմ ներկայացրել, մոտ 80 հիմնավորումներ եւ եթե այդ ամեն մի հիմնավորման ժամանակ դատավոր Արղամանյանն այդպես պետք է արձագանքի: Մենք եկել էինք վերաքննիչ դատարան արդարություն հայցելու համար, պարզվում է Վերաքննիչ դատարանում մեզ ծիծաղով են ընդունում»,- ասաց պաշտպանը: Գեւորգ Սաֆարյանը եւս միացավ պաշտպանի միջնորդությանը եւ նշեց, քանի որ ես նախապես գիտեմ, թե դատավճիռը ինչ պետք է լինի, այդքան էական տարբերություն էլ չկա, թե դատարանների վերաբերմունքն ինչպիսին է»: Դատավոր Մհեր Արղամանյանը խորհրդակցական սենյակից վերադառնալուց հետո մերժեց միջնորդությունը: Այսօրվա դատական նիստին չէր ներկայացել նաեւ գործով տուժողը՝ ոստիկան Գեղամ Խաչատրյանը «Ինձ թվում է տուժողը , մեղադրողը, իսկ առաջին ատյանի դեպքում նաեւ դատարանը մի կողմ են: Այս դեպքում դատարանը ոչ թե անկախ ազատ դատաքննություն է իրականացնում, այլ սպասարկում է մեղադրող եւ տուժող կողմի շահերը»,- ավելացրեց պաշտպան Տիգրան Հայրապետյանը Գործով դատական նիստը կշարունակվի ապրիլի 26-ին:
