«Տավուշի հյուսիսում դժվար էր գտնել չվերահսկվող քվեարկություն» (տեսանյութ)
Ընտրատեղամասերի 52 տոկոսում արձանագրվել է վերահսկվող քվեարկություն։ Այդ մասին այսօրվա ասուլիսին հայտնեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։ «Քվեարկության արդյունքների վրա ազդեցություն ունեցող արձանագրված ամենալուրջ և համատարած խախտումը վերահսկվող քվեարկությունն էր, երբ քվեարկողից բացի, այլ մարդիկ էլ են տեսնում, թե նա ինչպես է քվեարկում»,- ասաց նա։ Վերահսկվող քվեարկություն զգալի մասը արձանագրվել է Տավուշի հյուսիսում և Գեղարքունիքի հարավ-արևելյան շրջանում՝ Մարտունիում։ Ահազանգեր կային նաև Շենգավիթից, Արարատից և այլ տարածքներից։ Դրա մասին ոչ միայն դիտորդներն են ահազանգում, այդ քվեարկությունը երևում է անգամ տեղամասերում տեղադրված տեսախցիկների միջոցով։ «Տավուշի հյուսիսում մենք ուղղակի փորձում էինք գտնել մի տեղամաս, որտեղ մարդիկ ինքնուրույն են քվեարկում և միայնակ են մտնում քվեախցիկ, տեղամասերից շատերում քվեախցիկների հետևում կանգնած էին մարդիկ, տեղամաս կար, որտեղ չարձանագրվեց գոնե կես ժամ, երբ ընտրողը ինքնուրույն քվեարկեր»,- ասաց Դանիել Իոաննիսյանը։ «Իսկ հանձնաժողովի անդամները որևէ կերպ մտադրված չէին պայքարել վերահսկվող քվեարկության դեմ, արձանագրել , և այդ իրավիճակը շարունակվեց այնքան ժամանակ ինչքան և շարունակվեց ընտրողների ինտենսիվ հոսքը»,- ամփոփեց Դանիել Իոաննիսյանը։
