Սերժ Թանկյանը Հայաստանում երաժշտական փառատոն անցկացնելու մտադրություն ունի
Ամերիկահայ ռոք երաժիշտ Սերժ Թանկյանը Ֆրանս Պրես գործակալությանը տված հարցազրույցում նշել է, որ ուզում է ավելին անել Հայաստանի համար և ծրագրում է Հայաստանում անցկացնել երաժշտական փառատոն: Երգիչը հույս է հայտնել, որ Հայաստանը, որը հազվադեպ է հյուրընկալում արևմտյան կատարողների, կարող է ինտեգրվել Եվրոպայի ամառային փառատոնի շրջագայություններին, որի ժամանակ էլ երաժշտական խմբերը կայցելեն Հայաստան: «Ես միշտ երազել եմ Հայաստանում հիմնադրել միջազգային երաժշտական փառատոն»,- ասել է Թանկյանը: «Այնքան, որքան ես իրականացրել եմ քաղաքական և սոցիալական աշխատանք, կուզենայի նույնքան ժամանակ գտնել մշակութային և երաժշտական գործունեության համար»,- ավելացրել է Թանկյանը: 2015 թվականի ապրիլին, Հայոց ցեղասպանության 100-ամյակի միջոցառումներին, System of a Down խումբը իր առաջին համերգն ունեցավ Հայաստանում: Թանկյանը նշում է, որ համերգից հետո նա պատմությունը հաղթահարած լինելու զգացողություն է ունեցել՝ տեսնելով այդքան երիտասարդների և վերհիշելով իր նախնիներին: «Ես զգում էի, որ որոշակի առումով մեր ամբողջ կարիերան կառուցել ենք այդ մեկ համերգի համար»,- ասել է Թանկյանը:
