Ոչ թե ինքնիշխան «և-և» է եղել, այլ՝ թելադրված. Ստեփան Սաֆարյան (տեսանյութ)
ՀՀ ԱԺ «Ելք» խմբակցության հեղինակած «ՀՀ մասով Եվրասիական տնտեսական միության պայմանագրի գործողությունը դադարեցնելու գործընթաց սկսելու վերաբերյալ» ԱԺ հայտարարության նախագծի վերաբերյալ խորհրդարանական լսումներին այսօր մասնակցում էր Միջազգային և անվտանգության հարցերի հայկական ինստիտուտի» հիմնադիր նախագահ, քաղաքական վերլուծաբան Ստյոպա Սաֆարյանը: Նա իր ելույթում հիշեցրեց, թե ինչ էր խոստացվում ու ինչ ունենք այսօր. «Ապագայում մենք ունենալո՞ւ ենք այն հույսերը, ինչ մեզ խոստացել են: ԵՏՄ մեր անդամակցությունը փաստարկվել է բացառապես մեր անվտանգությամբ, թեեւ ՀՀ իշխանություններն այդպես էլ չպարզաբանեցին, թե անվտանգության ո՞ր բաղադրիչը նկատի ունեին՝ նշելով միայն լայն համագործակցության մասին: Եթե այսօր ասում ենք, թե «եւ-եւ»-ի քաղաքականությունը կայացել է, հիշեցնեմ Սերժ Սարգսյանի հարցազրույցը Բրյուսելում, նա ասաց՝ «ինձ ՌԴ-ից չեն կշտամբել՝ այս համաձայնագրի ստորագրման համար»: Թերեւս սա այն լավ օրինակն է, երբ հստակ երեւում է, որ ոչ թե ինքնիշխան «եւ-եւ» է եղել, այլ թելադրված: Անվտանգության այն բարձր խոստումները, որոնք տրվել էին ՀՀ-ին, չկան: Մեկ օրինակ բերեմ՝ հայտարարվեց, որ 2014թ. հունվարից սկսած 500 մլն դոլարի ներդրումներ պետք է լինեն «Նաիրիտ»-ում: Երկու տարի անց պետք է բացատրել հայ հանրությանը, թե ինչու խոստացված ուղիղ ներդրումները ՀՀ արդյունաբերությունում այդպես էլ չստացվեցին: Ինչ վերաբերում է գազի սակագներին, ապա հայտարարվեց, թե այն ՀՀ-ում վաճառվում է ՌԴ ներքին գներով, մինչդեռ մինչ օրս անհայտ է, թե ում է վաճառում ՌԴ-ն այդ մեծահոգությունը, քանի որ ՀՀ սպառողին գազը հասնում է թանկ գնով: Ասեմ ձեզ, որ ՀՀ-ում կարդացող, հասկացող զանգվածը բավականին մեծ է»:
