«Իշխանությունը կյանքի է կոչում Սասնա ծռերի «Ազգ-բանակ» կարգախոսը» (տեսանյութ)
Անհապաղ ազատ արձակել «Սասնա ծռեր» խմբի անդամ Արամ Մանուկյանին, դադարացնել նրա նկատմամբ քրեական հետապնդումը եւ նրան տուժող ճանաչել: Այսօր դատարանում նման միջնորդությամբ հանդես եկավ պաշտպան Հարություն Բաղդասարյանը. «Սասնա ծռերը կանխել են ավելի մեծ վտանգ, թույլ չեն տվել տարածքների հանձնում, ինչպես նաեւ իշխանությունը ընդունել է նրանց պահանջների իրավաչափությունը , իշխանությունը կյանքի է կոչում Սասնա ծռերի «Ազգ –բանակ» կարգախոսը, թեպետ ոչ այնպիսին, ինչպիսին նախատեսել էին Սասնա ծռերը: Այս առումով ծռերը պարզապես օժանդակել, օգնել են ՀՀ պետության կայացմանը»: Հարություն Բաղդասարյանի խոսքով՝ «Սասնա ծռերի» գործողությունները պայմանավորված են եղել ծայրահեղ անհրաժեշտությամբ եւ դրանք հանցագործություն դիտելը անթույլատրելի է։ Այն, փաստաբանի կարծիքով, ապստամբություն է։ «Դուք որպես փաստաբան, որի պարտականությունների մեջ է մտնում իրավաբանական օգնություն ցույց տալ իր վստահորդին, պարտադիր չէ, քաղաքական տարր մտցնել միջնորդության մեջ»,- ասաց Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արթուր Օհանյանը: Հարություն Բաղդասարյանը հայտարարեց, որ իրականում դատարանի մտավախությունը հասկանում է: «Դատարանն ինձ ասում է՝ պարոն Բաղդասարյան, դուք չգիտե՞ք մենք ինչ երկրում ենք ապրում»: Փաստաբաններից Երվանդ Վարոսյանը կոչ արեց դատավորին փաստաբաններին դասեր չտալ. «Այս դատավարության ընթացքում քաղաքական տարրից խուսափելն անհնար է: Կա գործողություն, կա նպատակ եւ ծնող պատճառներ» Լիպարիտ Սիմոնյանն էլ ավելացրեց՝ միջնորդության մեջ օրենքով արգելված որեւէ գործողություն առկա չէ։ Խորհրդակցական սենյակից վերադառնալուց հետո դատավոր Արթուր Օհանյանը մերժեց միջնորդությունը: Սա առաջացրեց «Սասնա ծռեր» խմբի անդամ Արամ Հակոբյանի դժգոհությունը: Նա հայտարարեց՝ Արամ Մանուկյանը տուժող է, նա ցանկացել է օգնել Պավել Մանուկյանին.«Իրեն անզեն գնդակահարել են: Այս մարդը վիրավորվել է, այս մարդուն գնդակահարել են այն ժամանակ, երբ ինքը դուրս է վազել օգնելու գնդակահարված հորը»: Դատավորի աչառու լինելու փաստով Հարություն Բաղդասարյանը ինքնաբացարկի միջնորդություն ներկայացրեց դատավոր Արթուր Օհանյանին, դատավորը խորհրդակցական սենյակից վերադառնալուց հետո մերժեց միջնորդությունը: Այնուհետեւ պաշտպանական կողմը միջնորդեց փոխել Տիգրան Մանուկյանի եւ Վարդան Գերավետյանի խափանման միջոցները: Վարդան Գերավետյանը նաեւ հաշվարկներ էր արել, թե տնտեսական ծանր վիճակում գտնվող պետությունը այս մեկ տարվա եւ 4 ամսվա ընթացքում որքան գումար է ծախսել իրենց վրա. «Մոտավորապես 32 անձի վրա ծախսվել է 150,000 դոլար, միգուցե այս խեղճ ու կրակ պետությունն այդ գումարները խնայեր եւ ծախսեր զենք-զինամթերք գնելու վրա: Մենք տնից դատարան կգնայինք եւ այդ խնայողությունը կլիներ»,-ասաց Վարդան Գերավետյանը: Նրա պատճառաբանությունները չհամոզեցին դատավորին: Նա որոշեց չփոխել «Սասնա ծռերի» երկու անդամների խափանման միջոցը:
