«Ուզում եմ, որ Հենրիխը լավ խաղա, որ շատ փող հավաքի» (տեսանյութ)
Սահմանին ապրող այս երեխաները կարծում են՝ իրենց դասարանցի Արմանը մի օր դառնալու է Հայաստանի Հանրապետության Նախագահ։ Ինքը Արմանը դեմ է՝ դատավոր է ուզում դառնալ։ Ներքին Կարմիրաղբյուրի դպրոցի աշակերտ Յանիսը չգիտի՝ ինչու է առաջադրում դասընկերոջ թեկնածությունը։ Բայց ինքն էլ Նախագահ դառնալ չէր ուզի։ 11-ամյա տղան այլ մասնագիտություն է գերադասում` ոստիկանի։ Այս դասարանում աշակերտների մեծ մասը իրեն տեսնում է բժշկի սպիտակ խալաթով։ Նրանցից տարիքով փոքրերն էլ են արդեն մասնագիտության հարցում կողմնորոշված։ Արտյոմի շապիկին՝ Հենրիխ Մխիթարյանի նկարն է, չնայած ֆուտբոլային կուռքը Հենրիխը չի։ Ուզում է ֆուտբոլիստ դառնալ եւ խաղալ Ռոնալդոյի պես։ Այնուամենայիվ, Արտյոմը տեղեկացված է՝ հայ ֆուտբոլիստը ինչպես խաղաց, որ ակումբ տեղափոխվեց։ Հենրիխի հետ կապված ցանկություն էլ ունի . «Ուզում եմ, որ լավ խաղա, որ շատ փող հավաքի» Նրա դասընկեր Գագիկը չի կողմնորոշվում ֆուտբոլիստ դառնալ, թե ռեպեր։ Վերջին շրջանում ինքը մի քանի անգամ հայտնվել է լրագրողների ուշադրության կենտրոնում, տեսախցիկը նրան չի կաշկանդում Մի քանի րոպեն բավարար է, որ մտքերը հավաքի եւ ռեպ կարդա։ Լարիսան իրենց 6 հոգանոց դասարանում միակ աղջիկն է։ Ուշադրության պակաս չի զգում, բայց այս մասին լռել չի կարող. «Վատն այն է, որ ես ընկերուհի չունեմ դասարանում»։ Ներքին Կարմիրաղբյուրի դպրոցում 80 աշակերտ է սովորում, նախորդ տարվա համեմամտ 6-ով ավելացել է։ 30 տարի առաջվա համեմատ քիչ է թվում, բայց դպրոցի տնօրեն Նառա Պապյանին սա արդեն իսկ ուրախացնում է, մանավանդ, որ հաջորդ տարի էլ է առաջին դասարանցիների թիվն ավելանալու։ Մանրամասները՝ տեսանյութում
