«Սերժ Սարգսյանի հայտարարությամբ պարզ դարձավ, թե ինչ է նշանակում «հավակնել», «լինել», «ցանկանալ» (տեսանյութ)
Հանրապետականները մոմ են վառել, մատաղ արել, որ Սերժ Սարգսյանը կդառնա ՀՀ վարչապետ, ասում է Միջազգային և անվտանգության հարցերի հայկական ինստիտուտի նախագահ Ստեփան Սաֆարյանը: ՀՀ նախագահ Սերժ Սարգսյանը չէր բացառել, որ ապրիլի 9-ից հետո վարչապետի պաշտոնում կարող է առաջադրվել իր թեկնածությունը: Մեկնաբանելով 2014թ-ի իր հայտնի հայտարարությունը, որ այլևս երբեք չի առաջադրվելու պետության ղեկավարի պաշտոնում, Սերժ Սարգսյանն ասել է. «Երբ գործիչն ուզում է քաղաքական հայտարարություն անել այն մասին, որ չի լինելու ինչ-որ տեղում, նա ասում է՝ ես չեմ լինելու այսինչ տեղում, ինչպես ես հստակ հայտարարել եմ, որ չեմ լինի Հայաստանի Հանրապետության նախագահ։ Բայց երբ պնդումը քաղաքական համատեքստ է պարունակում և խոսվում հավակնությունների ու պատկերացումների մասին, ուրեմն ասելիքն այլ հարթությունում է։ Դժվար չէ սա տարբերել»: Ըստ Ստեփան Սաֆարյանի Սերժ Սարգսյանի այս հայտարարությամբ հասարակությունն իմացավ, թե ինչ է նշանակում «հավակնել», «լինել», «ցանկանալ»: Լեզվաբան Նարինե Դիլբարյանն ասում է. «Սերժ Սարգսյանի գործունեության մեջ սա բացթողում էր, երբ ինքը հայտարարեց, որ չի առաջադրվելու: Մենք ունենք սահմանադրական փոփոխությունների փաթեթ, եթե տվյալ գործիչը չէր պատրաստվում լինել վարչապետ, ապա այս փոփոխությունները չէին լինի»: Սերժ Սարգսյանը նաեւ ասել էր, եթե ի վերջո որոշեն, որ վարչապետի պաշտոնում առաջադրվելու է իր թեկնածությունը, ապա դա կլինի մեկ հավելումով ՝ առ այն, որ սահմանադրական լիազորությունների ամբողջական իրականացմանը զուգահեռ ավելի շատ ժամանակ է հատկացնելու երիտասարդ քաղաքական լիդերներին մեր երկրի անցած տարիների երևացող ու չերևացող ողջ փորձը փոխանցելու համար։ «Երիտասարդների հիշողությունը ծանրաբեռնված չէ նրա մասին ինֆորմացիայով: Միգուցե իր թիմակիցներն իրենց արդեն սպառել են եւ հույսը դրել է երիտասարդների վրա»: Նույն համատեքստում է գնահատվում Շուշիի առանձնակի գումարտակի հրամանատար Ժիրայր Սեֆիլյանին 10 տարի 5 ամսով դատապարտելը՝ պարզապես ինչ-որ բան նախապատրաստելու համար։ Մեզ մոտ շատ դաժան են վարվում պատերազմում կռվածների հանդեպ: Շատ վիրավորական է նաեւ պատմության դասագրքերից Ժիրայր Սեֆիլյանի անունը հանելը, ասում է Նարինե Դիլբարյանը: Ըստ բանախոսների՝ հետսովետական տարածքում վերջին տարիներին կատարյալ ժողովրդավարություն չի եղել: «Բոլոր երկրներում սկսած սահմանադրական փոփոխություններից, խոսում են մտահոգիչ զարգացումների մասին: Ռուսաստանի ընտրությունները ճակատագրական են լինելու տարածաշրջանի համար: Մենք գործ ունենք խելահեղության խորացման հետ, երբ Պուտինի բարձր լեգիտիմությունը դնելու է արկածախնդիր քայլեր անելու հիմքեր»: Համեմատականներ տանելով Ռուսաստանի հետ՝ Ստեփան Սաֆարյանն ասաց, որ երկու երկրներում էլ ընդդիմադիր դաշտը ջախջախված է, հետընտրական պրոցես չկա, և առաջիկայում արտառոց որեւէ երեւույթ չի լինի:
