Ցանկացած լարում կարող է գալ միայն իշխանությունը սեփականաշնորհած մարդկանցից (տեսանյութ)
Փողոց դուրս եկած սերունդն արժանապատիվ է եւ անփորձ: Բայց հին եւ նոր սերնդի միջեւ կամուրջ կա՝ նա Նիկոլ Փաշինյանն է: «Այդ կամուրջը թույլ չի տա, որ կոպիտ սխալներ լինեն, իհարկե սխալներ կլինեն: Այն խմբավորումը, որը սեփականաշնորհել է պետությունն ու իշխանությունը, չի հասկանում, որ միանա, օգնի շարժմանը: Պնդում են, որ իրենք ընտրված իշխանություն են, իրենք պիտի որոշեն»,- ասում է ԳԽ նախկին պատգամավոր Վիգեն Խաչատրյանը: Այս դեպքում, ըստ քաղաքագետի, հանրապետականը որոշելու բան չունի, քանի որ վերջին օրերի իրադարձություններն այլ բան ցույց տվեցին. «Մի գյուղ չմնաց, որ ոչխար չմորթեն, քեֆ չանեն: Ինչի ժողովուրդն ուրախանում էր, որ Սերժ Սարգսյանը հեռանում էր՝ ոչ՝ ժողովուրդն ուրախանում էր, որ համակարգը վերջացավ, այլեւս իրենք են իրենց ճակատագրի, հողի տերը: Մեր պետության համար սա դրամատիկական պահ է: Ցանկացած լարում կարող է գալ միայն իշխանությունը սեփականաշնորհած մարդկանցից: Այս երիտասարդներտը ցանկություն չունեն լարման, բախման, սխալվելու»: Վիգեն Խաչատրյանը համոզված է՝ պետությունը բռնազավթված է, հիմա տեղի է ունենում պետական մեքենայի ազատագրում: Նա միաժամանակ շեշտեց՝ եթե երկրում ինչ-որ բան տեղի ունեցավ, ողջ պատասխանատվությունը կրում է վարչապետի պաշտոնակատար Կարեն Կարապետյանը:
