Տեսչական մարմինը կզբաղվի 5 համարի ավտոբուսների խնդրով. նախարար (տեսանյութ)
Երեւանի քաղաքապետարանից ահազանգ ենք ստացել, որ որոշ երթուղիների աշխատանք խոչընդոտվում է, այսօր լրագրողների հետ զրույցում ասաց ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը: «Երթուղային գծերի հսկողությունն իրականացվում է տեսչական մարմնի կողմից, որը նախկինում նախարարության կազմում էր, բայց հիմա ձեւավորվել է մեկ միասնական Տեսչական մարմին, որն այս պահին կազմավորման փուլում է: Հետեւաբար մենք չենք կարող գնալ վարչական ակտ կազմել, այդպիսի լիազորություն չունենք»,-ասաց նա: Նախարարի խոսքով, պետք է դեռ հասկանան ինդիրները եւ միջոցներ ձեռնարկեն: Հիշեցնենք, որ N5 երթուղու վարորդները դժգոհում են «Էջմիածին-Երեւան-Էջմիածին» միջմարզային N203 միկրոավտոբուսային երթուղու աշխատանքից: Այս գիծը սպասարկող տրանսպորտային միջոցները ուղեգիծը Երեւանի ավտոկայարանում ավարտելու փոխարեն հասնում են մինչեւ մետրոյի «Երիտասարդական» կայարան, Աբովյան պուրակ, ինչի պատճառով, ըստ վարորդների, խաթարվում է N5 ավտոբուսային երթուղու աշխատանքը: Նրանք հավաստիացնում են, որ ավտոբուսներում նկատվում է ուղեւորների նվազում:
