Մի քիչ անհասկանալի է նախագահի մոտեցումը. պատգամավորը` Վաղարշյանի առաջադրման մասին (տեսանյութ)
Աջակցիր «Ա1+»-ինԱնընդունելի է այն շեշտադրումը, որ հայրը զբաղեցրել է պաշտոն, տղան այլևս իրավունք չունի պաշտոն զբաղեցնելու: Այսօր «Իմ քայլը» խմբակցության նիստից հետո հայտարարեց պատգամավոր Նիկոլայ Բաղդասարյանը` անդրադառնալով ՍԴ դատավորի պաշտոնում Վահրամ Ավետիսյանի առաջադրմանը և դրան հետեւած քննադատություններին:
Ինչ վերաբերում է կոնկրետ գործերով շահերի բախման խնդրին, Բաղդասարյանն ասաց` սա քննարկելի հարց է պատգամավորների համար.
«Սահմանադրական մարմինները լիազորված են թեկնածու առաջադրելու, իսկ Ազգային ժողովը լիազորված է տվյալ թեկնածուին դրական կամ բացասական եզրակացություն տալու, և կարծում եմ` այստեղ Ազգային ժողովի որոշելիքի դաշտում է լուծումը, ԱԺ-ն իր վերաբերմունքը կդրսևորի և՛ հարցերի, և՛ քվեարկությունների միջոցով»:
Բաղդասարյանը հայտարարեց, որ քվեարկության վերաբերյալ «Իմ քայլը» խմբակցությունը չունի միասնական մոտեցում:
Ինչ վերաբերում է թեկնածուների շուրջ բուռն քննադատություններին, համոզմունք հայտնեց` ցանկացած իրավաբանի վերաբերյալ քննարկումներ կարող էին լինել:
Նախագահի կողմից երկրորդ անգամ Արթուր Վաղարշյանի առաջադրումն իբրեւ ՍԴ դատավորի թեկնածու պատգամավորի համար հասկանալի չէ.
«Մի քիչ անհասկանալի է նախագահի մոտեցումը, որ նույն թեկնածուին առաջադրում է` հասկանալով, որ ընտրողը նույնն է և ընտրողն արդեն իր որոշումը կայացրել է»,- ասաց նա:
