Տիկնիկային թատրոնը ելքը գտավ հանդիսատեսին հանդիպելու

Երևանի Հովհաննես Թումանյանի անվան տիկնիկային թատրոնը կուրախացնի իր հանդիսատեսին։ Ամեն շաբաթ և կիրակի օրերին թատրոնը  բացօթյա մանկական ներկայացումներ  կցուցադրի։

Թատրոնի փոխտնօրեն Արտաշես Բաբայանն «Ա1+»-ի հետ զրույցում ասաց, որ պահպանելով հակահամաճարակային կանոնները՝  բացօթյա սրահում սիրով կընդունեն փոքրիկներին։ 6 տարեկանից բարձր տարիք ունեցողների մուտքը թատրոն   դիմակով է։

«Այս շրջանում մենք փորձել ենք առցանց տարբերակով ներկայացումներ տեղադրել, նկարահանել և  տեղադրել  ենք ներկայացումներից սիրելի հատվածներ, երգեր։ Հիմա արդեն հնարավորություն ունենք բացօթյա իրականացնել»,- ասում է Արտաշես Բաբայանը։

Արտաշես Բաբայանի փոխանցմամբ՝ առաջինը ներկայացումը օգոստոսի 26-ին  է, մուտքը՝  առանց տոմսերի.  հանդիսատեսը կարող է ներկայացումը  կարող է դիտել մուտքի մոտից, կանգնած՝ պահպանելով գծանշված սոցիալական հեռավորությունը։

Օգոստոսի  29-ին ցուցադրվելու է  «Դում-Դում իմաստունը և անգետները», իսկ հաջորդ օրը՝  Հովհաննես՝ Թումանյանի «Անխելք մարդը», արդեն տոմսերով։