Որքան կարող է  տեւել սահմանային անորոշությունը, երբ Ադրբեջանն ամեն օր տարածքային պահանջ է ներկայացնում ոչ միայն Արցախին, այլեւ Հայաստանին

«Կապիտուլացված կողմի վրա միշտ փորձում են ավելի շատ ճնշում գործադրել և, կոպիտ ասած, պոկել ավելի շատ տարածքներ։ Հայաստանից որևէ դիմադրություն չկա և դա խոսում է այն մասին, որ այսօր Հայաստանի պետական և կառավարման համակարգը կազմալուծված է»,- ասում է ՀՀ արտակարգ և լիազոր դեսպան Արման Նավասարդյանը։

«Մեդիա կենտրոնում» կազմակերպված քննարկմանը «Մարդկային զարգացման միջազգային կենտրոն» ՀԿ նախագահ Թևան Պողոսյանը հիշեցնում է՝ ով է մեր թշնամին։

 «Ես հասկանում եմ, թե մեր դիմաց ով է կանգնած՝ նույն թուրքը։ 1915-ից հետո կասկածներ կա՞յին, որ առիթ ունենալու դեպքում մեզ միանգամից ինչ-որ կերպ վնասելու են, թե՞ 94-ից հետո կասկածներ կային, որ Ադրբեջանը միշտ էլ առիթը օգտագործելու է դիպուկային պատերազմի կամ դիվերսիաների համար։ Այնպես որ, հիմա էլ կասկածներ չկան։ Այո, այդ ամենը լինելու է շարունակական, մինչև իրենց երազանքներին կհասնեն։ Իրենք բացահայտ ասում են՝ երազում են Սյունիքը, Սևանն ու Երևանը վերցնել»,- ասում է  նա։

Ակնհայտ է՝ նԱդրբեջանի և Թուրքիայի հետ լավ հարաբերություններ ստեղծելով իրավիճակը հարթել հնարավոր չի լինի․ հավելում է Արման Նավասարդյանը․

 «Մի քանի օր առաջ շքերթի ժամանակ Էրդողանը Էնվեր Փաշայի ոգեկոչումն արեց, և մենք մոռանում ենք, որ Էնվեր Փաշան մեր եղեռնի համար մեկ մեղավորն է։ Թուրքիան այսօր նաև Ռուսաստանին է հասկացնում, որ առանց քեզ էլ ես կկարողանամ իմ խնդիրները լուծել և ես ինձ համարում եմ առանձին գերտերություն։ Եվ այն, ինչ անում է Ադրբեջանը Թուրքիայի դրդմամբ, անպայման կշարունակվի»։

Նրան զարմացնում է քաղաքական գործիչների որոշ հայտարարությունները․

«Այս իրադրության մեջ մարդիկ կան՝ նախարարի, պատգամավորի մակարդակով, հանդես են գալիս Թուրքիայի և Ադրբեջանի հետ խաղաղ գոյակցության և անգամ երջանիկ պայմաններ ստեղծելու կոչերով, ես ապշում եմ։ Դա կա՛մ քաղաքական տհասություն է, կա՛մ կրիտինիզմ։ Էրդողանն ասում է՝ ես կգամ, կգրավեմ Երևանը, մենք ասում ենք՝  մենք ուզում ենք դիվանագիտական հարաբերություններ հաստատել»։

Ի վերջո՝ ի՞նչ լուծումներ կարող են լինել Հայաստանի համար՝ հարցին Թևան Պողոսյանը պատասխանում է, որ պետք է դասեր քաղել հին սխալներից և չկրկնել դրանք։ Ինչպես նաև, ներկայիս իշխանությունը պետք է փոխվի, քանի որ այս նրա հանդեպ վստահություն այլևս չկա։

Արման Նավասարդյանը կարեւորում է  դիվանագիտական ճակատում փոփոխությունները։

«Մենք արտաքին քաղաքականության մեջ խայտառակ վիճակի հասանք պատերազմի շրջանում և կորցրինք այնպիսի լավ գործընկերոջ, ինչպիսին Իրանն է։ Երկրորդը՝ մենք կորցրինք կամ ձեռք չբերեցինք այնպիսի կարևոր գործընկերոջ, ինչպիսին Չինաստանն է։ Չնայած անընդհատ ասում էինք, որ մեր բազմավեկտոր դիվանագիտությունը հրաշքներ է գործում։ Եվ, ամենակարևորը, մենք Ռուսաստանի հետ փչացրել ենք մեր հարաբերությունները և դրանք նորից բարելավելու համար մեզ դիվանագիտական պրոֆեսիոնալ խումբ է հարկավոր»։

Բանախոսները վստահ են՝  պատերազմը չի ավարտվել  եւ պետք է  պատրաստվել բոլոր ուղղություններով։  Հաղթանակի համար Թեւան Պողոսյանը կարեւորում է  մի հանգամանք․

«Պետք է ձևավորենք մեր ազգային երազանքը։ Վեր հառնելու համար մեզ սեպտեմբերի 21-եր և սեպտեմբերի 2-ներ պետք են լինելու։ Լացելու, վայ-վայ անելու ճանապարհներով մենք տեղ չենք հասնի»։