«Այսօրվա դրությամբ անվստահությունը համար մեկ խնդիրներից մեկն է այս երկրում, իսկ այն երկրում, որտեղ անվստահություն կա, այդ երկիրը ապագա չունի»,-ասում է «Մարդկային զարգացման միջազգային կենտրոնի» ղեկավար Թեւան Պողոսյանը։

Ըստ նրա՝ իշխող մեծամասնությունը պետք է գիտակցի՝   քաղաքական պատասխանատվությունը պետք է լինի այն, որ իրենք խաղաղ ու գիտակցված հեռանան ու հնարավորություն ընձեռնեն ճգնաժամերի այս շարքը նոր մոտեցումներով  լուծելու։

Նա նշում է, որ ճգնաժամային իրավիճակում ուշադրություն են դարձվում երկրորդական հարցերին, իսկ առաջնային հարցերն անուշադրության են մատնված:

«Տնտեսական ճգնաժամերի ընթացքում, երբ գալիս են մոտեցումները, և չկա ոգեշնչում և ապագան տեսնելու  ցանկություն, մենք չենք կարող տեսնել նոր մոդելներ, և լավագույնը կլինի այն, որ գործողը գնա, ունենանք հակաճգնաժամային կառավարման ժամանակահատված, որը թույլ կտա, զուգահեռ դրան, քաղաքական դաշտում ձևավորել նոր թիմեր, նոր մոտեցումներ, քաղվեն դասեր, որ պարագայում կախված չլինենք մեկ անձի կամ հին քաղաքական մշակույթի խնդիրներից, ճգնաժամերի փուլերը հաղթահարելուց հետո կազմակերպել նոր ընտրություններ, որտեղ ժողովուրդը սթափ կմասնակցի ընտրությունների»,- ասաց Թևան Պողոսյանը

Նրա խոսքով՝ այն քաղաքական ուժը, որը խոստումներ է տվել ու չի կարողացել կատարել կամ խաբել է, պետք է կրի քաղաքական պատասխանատվություն․ «Ամենամեծագույն քաղաքական պատասխանատվությունը, երբ որ դու ինքդ քեզ  գնահատում ես, գրիչը վերցնում ես, թուղթը դնում ես սեղանին ու քո հրաժարականն ես տալիս»,- նշեց նա։

Սակայն նա կարծում է, որ հիմա ընտրություններ անցկացնելը ամենասխալ բանն է․ «Մեր ականջները պատրաստ չեն ապագա լսել կամ հավատալ, մտածել, թե ովքեր են լինելու»։

Թևան Պողոսյանի կարծիքով՝ հանրություն ունի  լուրջ բարոյահոգեբանական խնդիրներ:

«Եթե որևէ մեկն ասում է՝ իմ երեխան պիտի Արցախում չծառայի, մյուս անգամ բոլոր սահմանային գոտիներին է ասելու՝ Սյունիք, Տավուշ և այլն, թշնամին էլ հասնելու է իր նպատակին, նրանք անիմաստ չեն ասել, որ Սյունիքն էլ է մերը, Սևանն էլ, մի օր էլ Երևանը։ Պիտի  Արցախի նկատմամբ մենք չկորցնենք մեր զգացմունքները»,- ասաց բանախոսը: