Երեւանում հերթական բարձրահարկի փոսը փորել են․  քաղաքապետարանից ասում են՝  թույլտվություն դեռ չեն տվել

Արդեն երկու ամիս է՝  առավոտյան 9-ից մինչեւ  աշխատանքային օրվա ավարտը,  բացառությամբ կիրակիների,  16 թաղամասում (Նորաշեն) աղմուկ եւ փոշի է։ Մեքենաները, դուրս գալով նախկին մանկապարտեզի տարածքից, տեղափոխում են քար ու հող։  Ինչ է տեղի ունենում քարե բարձր պարսպներից այն կողմ, դժվար է ասել, չկա որեւէ պաստառ ու ցուցանակ։  Այդ պարիսպները փակ են  եւ բացվում են՝ միայն բեռնատարների ելումուտի ժամանակ։

Բայց եթե բարձրանաք հարեւանությամբ գտնվող բարձրահարկերից որեւէ մեկը, կնկատեք, որ տարածքը վերածվել է շինհրապարակի։

Ինչ է  կառուցվում՝  հարցի պատասխանը ստանալու համար  «Ա1+»-ը  գրավոր հարցում ուղարկեց Երեւանի քաղաքապետարան։

«Ի պատասխան Ձեր հարցման՝ տեղեկացնում ենք, որ Երևան քաղաքի Նորաշեն թաղամասի հ.47/5 հասցեում գտնվող՝ հասարակական կառուցապատման գործառնական նշանակությամբ, 0.29 հա մակերեսով հողամասը սեփականության իրավունքով պատկանում է քաղաքացի Արսեն Արարատի Եսայանին /անշարժ գույքի նկատմամբ իրավունքների պետական գրանցման վկայական  հ.1205.2021-01-0162/:

Վերը նշված հասցեում բնակելի շենքի կառուցման համար կառուցապատող Արսեն Եսայանին 21.06.2021 թվականին տրվել է հ.01/18-07/2-75724-529 նախագծման թույլտվություն, որով նախատեսված է կառույցն իրականացնել համահարթեցման նիշից՝ ստորգետնյա և մինչեւ 16 վերգետնյա հարկերով, սակայն նշված ՃՀԱ-ի հիման վրա դեռևս նախագիծ չի համաձայնեցվել Երևանի քաղաքապետարանի հետ, ինչպես նաև չի տրվել շինարարության թույլտվություն:

Բացի այդ, Երևանի քաղաքապետարանի կողմից 22.07.2021 թվականին՝ 6 ամիս ժամկետով, տրվել է հ.01/18-Ե-1252-46 քանդման թույլտվությունը՝ նշված հասցեում առկա /նաև վկայականում ամրագրված/ 98.58 քմ մակերեսով ինքնակամ շինությունը քանդելու համար»,- նշվում է Երևանի քաղաքապետարանի լրատվության վարչության պատասխանում։

Ըստ քաղաքապետարանի՝ քանդման թույլտվությունը տրվել  է   հուլիսի 22-ին, մինչդեռ այս լուսանկարն արվել է հուլիսի 17-ին, երբ  քանդման աշխատանքներն  օրեր առաջ արդեն սկսվել էին։  Փոսն էլ, ակնհայտ է,  ընդամենը 98.58 քմ մակերեսով ինքնակամ շինությունը քանդելու հետեւանքով չէ, որ առաջացել է։

Շենքը կառուցվում է մի թաղամասում, որտեղ կան մի քանի կիսակառույցներ։  Ասում են՝ դրանց կառուցումը կիսատ է մնացել, քանի որ սեյսմիկ մասնագետների գնահատականներով՝ այս  թաղամասում  այլեւս վտանգավոր է 16 հարկանի շենքերի կառուցումը։  Թաղամասի վերջին նորակառույցը  16 հարկանի չէ՝  ի տարբերություն հարեւան շենքերի։

Ի դեպ, բնակիչները չգիտեին՝ ինչ է տեղի ունենում պարիսպներից այն կողմ։ Մեկը  լսել էր՝ եկեղեցի է կառուցվում, մյուսին թվացել էր՝ նորից մանկապարտեզ են վերաբացելու։