«Ոստիկանությունը այսօր կատարել է ապօրինի գործողություն և այս գործողությունը դեռ իրավական գնահատական է ստանալու, սա էսպես չի մնալու»․ այս մասին նշեց «Ապրելու երկիր» կուսակցության համահիմնադիր  Մանե Թանդիլյանը՝  Փարաքար համայնքի բնակիչների կազմակերպած ցույցի ժամանակ։

Ցույցի մասնակիցները պահանջում էին, որ «Ապրելու երկիր» կուսակցության ներկայացուցիչ,  քաղաքապետի թեկնածու Վոլոդյա Գրիգորյանը մուտք գործի համայնքապետարան։

Ոստիկանության ներկայացուցիչները թույլ չէին տալիս, որ Վոլոդյա Գրիգորյանը մուտք գործի համայնքապետարանի շենք։

Այնուհետև ոստիկանները բացեցին ճանապարհը դեպի համայնքապետարան՝ Վոլոդյա Գրիգորյանի համար։ Քաղաքապետի թեկնածուն նշեց, որ ավարտում են ցույցը և անցնում իրենց բնականոն աշխատանքին։

«Ապրելու երկիր» կուսակցության համահիմնադիր Մանե Թանդիլյանը նաև նշեց, որ մինչ այժմ «Ապրելու երկիր» կուսակցությունը մասնակցել է 15 ընտրությունների և այն բոլոր համայնքներում, որտեղ իրենք հաղթելու հնարավորություններ են ունեցել, իշխող ուժը արհեստական խոչընդոտներ է ստեղծել․ «Վարչական բոլոր մեխանիզմները օգտագործվում են իշխանություն պահպանելու համար»,_ավելացրեց նա։

Հիշեցնենք, որ ընտրությունների արդյունքով 10 մանդատ ստացել էր «Ապրելու երկիր» կուսակցությունը, 5 մանդատ «Դավիթ Մինասյան» դաշինքը, իսկ 6 մանդատ ստացել է «Քաղաքացիական պայմանագիր» կուսակցությունը։

Դավիթ ՄԻնասյան դաշինքը գլխավորող Դավիթ Մինասյանը նշել էր, որ ինքը դարձել է քաղաքապետ, նույնը հայտարարել է նաև  «Ապրելու երկիր» կուսակցության ներկայացուցիչը։