«Որտե՞ղ էր ԵԽԽՎ-ն, երբ Ադրբեջանը պատերազմ սանձազերծեց Արցախի դեմ և օկուպացրեց ՀՀ տարածքները» (տեսանյութ)
Աջակցիր «Ա1+»-ինԱյսօր, երբ ԵԽԽՎ-ում արտահերթ քննարկվում էր Ռուսաստանի՝ Ուկրաինայի դեմ հարձակումը, ՀՀ պատվիրակության անդամ Արմեն Գեւորգյանը հայտարարեց, որ չի կարող մի հարց չտալ ինքն իրեն։ Իսկ այդ հարցը սա էր ․ « Որտեղ է եղել մեր կազմակերպությունը, երբ անդամ պետությունը` Ադրբեջանը, պատերազմ սանձազերծեց Արցախի Հանրապետության դեմ և թույլ տվեց օկուպացնել մեկ այլ անդամ պետության` Հայաստանի ինքնիշխան տարածքները»
«Բոլորին հիշեցնենք, որ 2020 թվականի սեպտեմբերին Ադրբեջանը պատերազմ սկսեց՝ հայ ժողովրդին սեփական պատմական հողերում ապրելու իրավունքից զրկելու համար։ Թուրքական մարտական անօդաչու սարքերը օգտագործվել են հազարավոր մարդկանց սպանելու, հիվանդանոցներ, դպրոցներ և բնակելի տներ ոչնչացնելու համար։ Պարզապես պատկերացրեք, թե ինչ հիասթափություն են ապրում այդ շարքային քաղաքացիները Լեռնային Ղարաբաղում և Հայաստանում, երբ նրանք չեն տեսնում ԵԽ կողմից սահմանված որևէ պատժամիջոցներ»,- ասաց նա։
Ապա երկրորդ հարցը հնչեցրեց, արդյոք ԵԽԽՎ պատվիրակները գիտե՞ն այս օրերին Լեռնային Ղարաբաղում ծավալվող հումանիտար աղետի մասին․
«Ավելի քան մեկ շաբաթ այնտեղ բնակչությունը զրկված է բնական գազից և էլեկտրաէներգիայից։ Բնակելի թաղամասերը մշտական գնդակոծության տակ են։ Ավելին, Ադրբեջանի կառավարությունը բարձրախոսներով պահանջում է, որ բնակիչները լքեն իրենց տները: Այս ամենը վկայում են էթնիկ զտումների և միջազգային իրավունքի ամենատարրական նորմերի խորը խախտման մասին»։
«Բայց արդյո՞ք մեր կազմակերպությունը կկարողանա կանխել նոր ողբերգությունը Լեռնային Ղարաբաղում։ Այս կասկածները ծագում են նրանից, որ այս այստեղ ընդունված նախկին բանաձեւերը դե ֆակտո օրինականացրել են Ադրբեջանի կողմից սանձազերծված պատերազմի արդյունքները՝ արհեստականորեն մեղադրելով հակամարտության երկու կողմերին։
Որպես Հայաստանի ներկայացուցիչ՝ ես հիանալի հասկանում եմ ցանկացած պատերազմի ողբերգությունը։ Ես իսկապես կոչ եմ անում հնարավորինս շուտ խաղաղություն հաստատել Ուկրաինայում։
Որքան էլ մեզ՝ հայերիս համար ցավալի է հետևել Ուկրաինայում շարունակվող աղետին, նույնքան էլ անընդունելի է միջազգային կազմակերպությունների կողմից ցուցաբերվող ընտրողական մոտեցումները։ Խաղաղության և մարդու հիմնարար իրավունքների պաշտպանության կարևորությունը մեծ և փոքր պետությունների համար չի կարող տարբերվել։ Չկան լավ կամ վատ պատերազմներ։ Ես իսկապես հույս ունեմ, որ մեզ համար Եվրոպայում հայ, ուկրաինացի և այլ երեխաների տառապանքը աշխարհաքաղաքական ծագում չունի։ Մենք պետք է մտածենք, թե ինչու են այդքան հաճախ պատերազմներ սանձազերծվում Եվրոպայում։
Հետևաբար, մեր պատմական առաքելությունը չկորցնելու համար պետք է մտածենք, թե ինչու Խորհրդային Միության փլուզումից հետո մենք չկարողացանք կառուցել հակամարտություններից զերծ, միասնական և ներառական եվրոպական ազգերի ընտանիք»,- ասաց Արմեն Գեւորգյանը իր ելույթում։
Նա ԵԽԽՎ արտահերթ նիստին մասնակցում էր Երեւանից՝ հեռավար։
