Սոցապնախարարը խոստացավ ուսումնասիրել ոտքը կորցրած սպայի դեպքը (տեսանյութ)
Աջակցիր «Ա1+»-ինԳրառման մասին տեղյակ եմ, նաև այդ խնդրին եմ տեղյակ։ Եվ սա շատ ցավոտ խնդիր է։ Այսօր խորհրդարանում լրագրողների հետ ճեպազրույցում անդրադառնալով 44-օրյա պատերազմում ոտքը կորցրած սպայի բարձրացրած հարցին՝ ասաց ՀՀ աշխատանքի և սոցիալական հարցերի նախարար Նարեկ Մկրտչյանը և նշեց՝ պատերազմից հետո հաշմանդամության կարգերը տրվելուց հետո սահմանված կարգով կա ժամանակահատված, որից հետո մարդիկ պետք է անցնեն փորձաքննություն։
«Եվ ըստ էության, քաղաքական որոշման արդյունքում չի տրվում հաշմանդամության կարգը։ Կա հիվանդությունների դասակարգիչ, որը հաստատվում է ԱՀԿ-ի կողմից։ Երբ փորձաքննող բժիշկները պատերազմի ժամանակ հաշմանդամություն ստացած մեր տղաների կարգը 2-րդից դարձնում են 3-րդ՝ էստեղ ոչ թե քաղաքական որոշման հարց է, այլ համապատասխան այդ դասակարգիչների ստանդարտներին»,-պարզաբանում է սոցապ նախարարը։
Ըստ Նարեկ Մկրտչյանի, ստացվում է՝ տվյալ անձի առողջական վիճակի մեջ տեղի է ունեցել առողջական վիճակի որոշակի բարելավում։ Նախարարը օրինակ է բերում իր մի շարք հանդիպումները հաշմանդամություն ունեցող անձանց հետ, երբ ուղիղ հարց է հնչել՝ հաշմանդամությունը կապելով սոցիալական խնդրին։
«Միգուցե պետք է մասնագիտական վերապատրաստում, պետք են կրթական որոշակի հնարավորություններ, պետք են աշխատանքի ապահովման որոշակի հնարավորություններ տրամադրել։ Եվ եթե այս ճանապարհով ենք գնացել, մարդիկ հասկացել են, որ հաշմանդամության կարգավիճակը չպետք է կապել սոցիալական հնարավորությունների հետ։ Բայց եթե եղել են օբեկտիվ բողոքներ, կա սահմանված կարգ»,- նկատում է սոցապնախարարը՝ նշելով, որ եթե փորձաքննության արդյունքները չեն բավարարում, կարող են դիմել վերափորձաքննության, դրանից հետո՝ նախարարություն, որտեղ դեպքն ուսումնասիրելուց հետո կամ պահպանվում է սահմանված կարգը, կամ որոշում է կայացվում, որ կա որոշակի սխալ, և փոխվում են որոշումները։
«Եթե սա էլ չի բավարարում կարող են դատական կարգով հարցը լուծել»,- ասաց Նարեկ Մկրտչյանը։
Մանրամասները՝ տեսանյութում։
